បរទេស ៖ យោងតាមការចេញផ្សាយរបស់ RT មេដឹកនាំកំពូល អ៊ីរ៉ង់ លោក Ayatollah Seyyed Ali Khamenei បានជំរុញឱ្យបណ្តាប្រទេស មូស្លីមដាក់ទណ្ឌកម្ម ទៅលើផលិតផលប្រេង និងអាហារ ទៅឲ្យប្រទេសអ៊ីស្រាអែល ដើម្បីដាក់សំពាធឲ្យរដ្ឋាភិបាលនេះ បញ្ឈប់ប្រតិបត្តិការ យោធារបស់ខ្លួន នៅក្នុងតំបន់ហ្គាហ្សា។
ថ្លែងទៅកាន់និស្សិតនៅទីក្រុងតេហរ៉ង់ កាលពីថ្ងៃពុធ លោក Khamenei បាននិយាយថា៖អ្វីដែលរដ្ឋាភិបាល អ៊ីស្លាមត្រូវតែទទូចគឺ ការបញ្ឈប់ ជាបន្ទាន់នូវឧក្រិដ្ឋកម្ម នៅក្នុងតំបន់ហ្គាហ្សា ដោយស្នើថាប្រទេសមូស្លីម គួរតែទប់ស្កាត់ការនាំចេញប្រេង និងអាហារទៅកាន់របបទីក្រុងយេរូសាឡឹម។
លោកបានបន្តអះអាងថា៖ អ៊ីស្រាអែលឥឡូវនេះ ស្ថិតក្នុងស្ថានភាពតក់ស្លុត និងអស់សង្ឃឹម ហើយមិនដឹងថា ត្រូវធ្វើអ្វីនោះទេ ខណៈដែលចង្អុលបង្ហាញថា ព្រឹត្តិការណ៍នៅហ្គាហ្សា បានជំរុញឱ្យមនុស្សដើរតាមដងផ្លូវ និងបរិហារសកម្មភាព របស់អ៊ីស្រាអែល មិនត្រឹមតែនៅក្នុង រដ្ឋដែលភាគច្រើន កាន់សាសនាឥស្លាម ប៉ុន្តែក៏មាននៅក្នុងសហរដ្ឋអាមេរិក និងអឺរ៉ុបខាងលិចផងដែរ។
គួរឲ្យដឹងដែរថា កាលពីពាក់កណ្តាលខែតុលា រដ្ឋមន្ត្រីការបរទេស អ៊ីរ៉ង់ លោក Hossein Amir-Abdollahian ក៏បានធ្វើការអំពាវនាវស្រដៀងគ្នានេះ ដោយស្នើឱ្យប្រទេសមូស្លីម ដាក់ទណ្ឌកម្មជាបន្ទាន់ និងពេញលេញ ទៅលើការនាំចូលប្រេង ឲ្យទៅប្រទេស អ៊ីស្រាអែលផងដែរ ៕
ប្រែសម្រួល៖ស៊ុនលី
