ព្រុចសែល៖ ប្រធានគណៈកម្មការអឺរ៉ុបលោកស្រី Ursula von der Leyen នឹងទៅបំពេញទស្សនកិច្ចនៅអ៊ុយក្រែន ក្នុងខែនេះ នេះបើតាមសារព័ត៌មាន TSN.ua បានរាយការណ៍កាលពីថ្ងៃព្រហស្បតិ៍ ដោយដកស្រង់សម្តីឧបនាយករដ្ឋមន្ត្រីអ៊ុយក្រែន លោកស្រី Olga Stefanishina ។
លោកស្រី Stefanishina បានឲ្យដឹងថាក្នុងអំឡុងពេល នៃដំណើរទស្សនកិច្ចរបស់លោកស្រី von der Leyen នឹងជួបពិភាក្សា ជាមួយប្រធានាធិបតីអ៊ុយក្រែន លោក វូឡូឌីមៀ ហ្សេឡិនស្គី មុនពេលការប្រកាស របស់សហភាពអឺរ៉ុប អំពីការសម្រេចចិត្ត របស់ខ្លួនទាក់ទងនឹងការ ចាប់ផ្តើមការចរចា ស្តីពីការចូលជាសមាជិករបស់អ៊ុយក្រែន ទៅក្នុងប្លុកនេះ ។
លោកស្រីបានលើកឡើងថា ភាគីនានានឹងពិភាក្សាអំពីវឌ្ឍនភាព របស់អ៊ុយក្រែន ឆ្ពោះទៅរកសមាជិកភាព សហភាពអឺរ៉ុប ដែលនឹងត្រូវបានបង្ហាញ ដោយគណៈកម្មការអឺរ៉ុប នៅក្នុងរបាយការណ៍ចុងក្រោយ នៅថ្ងៃទី០៨ ខែវិច្ឆិកា ។
លោក Stefanishina បានលើកឡើងថា អ៊ុយក្រែនរំពឹងថា នឹងមានការសម្រេចចិត្ត ជាវិជ្ជមានទាក់ទងនឹងការចាប់ផ្តើមកិច្ចចរចា ចូលជាសមាជិកសហភាពអឺរ៉ុប នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
យោងតាមសមាជិកសភាអ៊ុយក្រែន Oleksii Honcharenko លោកស្រី von der Leyen នឹងបំពេញទស្សនកិច្ចនៅអ៊ុយក្រែន នៅថ្ងៃទី០៤ ខែវិច្ឆិកា។ នៅខែមិថុនា ឆ្នាំ២០២២ មេដឹកនាំសហភាពអឺរ៉ុប បានទទួលយកអ៊ុយក្រែន ជាបេក្ខជនសម្រាប់សមាជិកភាពនៅក្នុងប្លុកនេះ។
កាលពីខែមុន លោក ហ្សេឡិនស្គី បានលើកឡើងថា ការចាប់ផ្តើមកិច្ចពិភាក្សាស្តីពីការចូលជាសមាជិកអឺរ៉ុប នៅឆ្នាំនេះគឺជាអាទិភាពកំពូល សម្រាប់អ៊ុយក្រែន ៕
ប្រែសម្រួល ឈូក បូរ៉ា
