តូក្យូ៖ ប៉ូលិសបានឲ្យដឹងថា រថយន្តមួយគ្រឿងបានបើកបុករបាំងការពារ ដែលដាក់នៅជិតស្ថានទូតអ៊ីស្រាអែល ក្នុងទីក្រុងតូក្យូនៅថ្ងៃព្រហស្បតិ៍នេះ ដោយបានបណ្ដាលឲ្យរងរបួសមន្ត្រីប៉ូលិសកុបកម្ម ដែលយាមនៅចំពេលសន្តិសុខ ដែលកើនឡើងដោយសារតែជម្លោះអ៊ីស្រាអែល និងក្រុមហាម៉ាស។
ប៉ូលីសបានចាប់ខ្លួនលោក Shinobu Sekiguchi អាយុ ៥៣ឆ្នាំដែលជាសមាជិកនៃក្រុមស្តាំនិយម នៅកន្លែងកើតហេតុដោយចោទប្រកាន់ថា បានរារាំងមុខងាររបស់មន្រ្តី ដោយវាយលោកនៅម៉ោងប្រហែល ១០ និង ៥០នាទី ព្រឹកនៅលើផ្លូវមួយចម្ងាយ ៦០ ម៉ែត្រក្បែរស្ថានទូត។
ប្រហែល ៦ម៉ោងមុនពេលកើតហេតុ ការបង្ហោះដែលគេជឿថាត្រូវបានធ្វើឡើងដោយ Sekiguchi នៅលើ X ដែលពីមុនហៅថា Twitter បាននិយាយថា “អ៊ីស្រាអែល មានកំហុស ចំពោះការលុកលុយតំបន់ហ្គាហ្សាស្ទ្រីប” នេះបើយោងតាមប្រភពជិតស្និទ្ធនឹងបញ្ហានេះ។
លោកបានសារភាពចំពោះការចោទប្រកាន់នេះ ហើយបាននិយាយថា លោកមានអារម្មណ៍សោកស្ដាយ ចំពោះមន្ត្រីប៉ូលិសនេះបើតាមប៉ូលិស។ មន្ត្រីវ័យ២០ឆ្នាំរូបនេះ បានរងរបួសដែលរួមមានបាក់ម្រាមដៃ។
ឧបទ្ទវហេតុនេះបានកើតឡើង ចំពេលមានការរឹតបន្តឹងសន្តិសុខ ខណៈដែលក្រុមផ្សេងៗបាននិងកំពុង ធ្វើបាតុកម្មនៅជិតស្ថានទូត ដើម្បីតវ៉ាចំពោះការវាយប្រហាររបស់អ៊ីស្រាអែល លើតំបន់ហ្គាហ្សាស្ទ្រីប។
យោធាអ៊ីស្រាអែល បាននិងកំពុងបង្កើនការលុកលុយដី របស់ខ្លួននៅតំបន់ហ្គាហ្សា ដែលជាផ្នែកមួយនៃការប៉ុនប៉ងរបស់ខ្លួន ដើម្បីកម្ចាត់ក្រុមសកម្មប្រយុទ្ធប៉ាឡេស្ទីនហាម៉ាស បន្ទាប់ពីខ្លួនបានធ្វើការវាយប្រហារឆ្លងព្រំដែន ដ៏ប្រល័យកាលពីថ្ងៃទី៧ ខែតុលា ដែលក្នុងនោះជនស៊ីវិលរាប់រយនាក់ ត្រូវបានចាប់ធ្វើជាចំណាប់ខ្មាំង ៕
ប្រែសម្រួល ឈូក បូរ៉ា
![](https://dap-news.com/wp-content/uploads/2020/08/1-1.png)