បរទេស៖ មូលដ្ឋានយោធារបស់អាមេរិកមួយកន្លែងនៅក្នុងផ្នែកកាន់កាប់ នៃភាគឦសានប្រទេសស៊ីរី បានស្ថិតនៅក្រោមការវាយប្រហារដោយយន្តហោះគ្មានមនុស្សបើកដែលបានធ្វើឱ្យសមាជិកសេវាម្នាក់រងរបួស។
មូលដ្ឋានទ័ពនេះមានទីតាំងនៅ Tel Baidar ក្នុងខេត្ត Hasaka ភាគខាងកើតប្រទេសស៊ីរី នេះបើតាម Al Mayadeen ដែលមានមូលដ្ឋាននៅទីក្រុង Beirut បានរាយការណ៍កាលពីថ្ងៃសៅរ៍។
យោងតាមសារព័ត៌មាន Sputnik ចេញផ្សាយកាលពីយប់ថ្ងៃទី១៨ ខែវិច្ឆិកា ឆ្នាំ២០២៣ បានឱ្យដឹងថា សហរដ្ឋអាមេរិកបានបង្កើតមូលដ្ឋានយោធាចំនួន ២៤ និងប៉ុស្តិ៍ចំនួន ៤ នៅក្នុងប្រទេសស៊ីរី ទោះបីជាមានការតវ៉ាពីរដ្ឋាភិបាលស៊ីរីក៏ដោយ។
ការដំឡើងយោធារបស់សហរដ្ឋអាមេរិក នៅក្នុងប្រទេសស៊ីរី និងអ៊ីរ៉ាក់ ត្រូវបានវាយប្រហារច្រើនជាងមួយលើក បន្ទាប់ពីជម្លោះអ៊ីស្រាអែល និងប៉ាឡេស្ទីន កាន់តែកើនឡើងកាលពីខែមុន។
ខណៈពេលដែលសហរដ្ឋអាមេរិក បានស្តីបន្ទោសការវាយប្រហារទាំងនេះ ទៅលើក្រុមដែលមានទំនាក់ទំនងជាមួយអ៊ីរ៉ង់ ទីក្រុងតេអេរ៉ង់បានច្រានចោលការចោទប្រកាន់ទាំងនេះវិញផងដែរ៕ ប្រែសម្រួលៈ ណៃ តុលា
