បរទេស៖ កាសែតរុស្សី បានដកស្រង់ប្រភពចេញពីប្រព័ន្ធផ្សព្វផ្សាយក្នុងស្រុកបានឲ្យដឹងថាថា រដ្ឋមន្ត្រីការបរទេសអ៊ីស្រាអែល លោក Eli Cohen បានព្រមានអង្គការសហប្រជាជាតិថា មជ្ឈិមបូព៌ាអាចធ្លាក់ចូលទៅក្នុងសង្គ្រាមទ្រង់ទ្រាយធំ ប្រសិនបើក្រុមសកម្មប្រយុទ្ធ Hezbollah នៅតែស្ថិតនៅភាគខាងត្បូងប្រទេសលីបង់ ក្បែរព្រំដែនជាមួយប្រទេសអ៊ីស្រាអែល។
ទូរទស្ស៍ប៉ុស្តិ៍លេខ១២របស់អ៊ីស្រាអែលបានអះអាងថា អ្នកការទូតបានចេញការព្រមានបន្ទាប់ពីប៉ុន្មានសប្តាហ៍នៃការបាញ់ផ្លោង និងការប៉ះទង្គិចគ្នានៅលើព្រំដែនអ៊ីស្រាអែល-លីបង់។ ការប៉ះទង្គិចគ្នាកាន់តែខ្លាំងឡើងចាប់តាំងពីការលុកលុយយ៉ាងសាហាវដោយក្រុមសកម្មប្រយុទ្ធប៉ាឡេស្ទីនហាម៉ាស ចូលក្នុងប្រទេសអ៊ីស្រាអែលកាលពីថ្ងៃទី ៧ ខែតុលា។
Hezbollah និយាយថា ខ្លួនបានចូលរួមជាមួយពួកសកម្មប្រយុទ្ធនៅតំបន់ហ្គាហ្សាក្នុងការប្រយុទ្ធរបស់ពួកគេប្រឆាំងនឹងអ៊ីស្រាអែល ប៉ុន្តែរហូតមកដល់ពេលនេះបានបញ្ឈប់ការវាយលុកដ៏ធំមួយពីប្រទេសលីបង់។
អង្គការនិកាយស៊ីអ៊ីតឬ Shiiteមួយនេះមានទំនាក់ទំនងយូរអង្វែងជាមួយអ៊ីរ៉ង់ ហើយត្រូវបានគេជឿថាមានឧបករណ៍ល្អជាង និងមានទម្រង់ខ្លាំងជាងក្រុមប៉ាឡេស្ទីនដែលកំពុងប្រតិបត្តិការនៅតំបន់ហ្គាហ្សា និងតំបន់ West Bank ៕ ប្រែសម្រួល៖ស៊ុនលី
