បរទេស៖ យោងតាមគណៈកម្មាធិការជាតិប្រឆាំងអំពើពុករលួយ (NACC) របស់ប្រទេសថៃ បានឱ្យដឹងថា អតីតនាយករដ្ឋមន្ត្រី លោក ប្រាយុទ្ធ ចាន់អូចា និងភរិយា មានទ្រព្យសម្បត្តិចំនួន ២,៨លានបាត ខណៈដែលអតីតឧបនាយករដ្ឋមន្ត្រី លោក ប្រាវីត វង់ស៊ូវ៉ាន់ មានទ្រព្យសម្បត្តិច្រើនជាង ២ លានបាតនៅពេលចាកចេញពីតំណែង។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី២៥ ខែវិច្ឆិកា ឆ្នាំ២០២៣ បានឱ្យដឹងថា ទ្រព្យសម្បត្តិរបស់ឧត្តមសេនីយ ប្រាយុទ្ធ និងឧត្តមសេនីយ៍ ប្រាវីដ ទទួលបានការចាប់អារម្មណ៍បំផុត នៅពេលដែលទីភ្នាក់ងារប្រឆាំងអំពើពុករលួយកាលពីថ្ងៃសុក្របានចេញផ្សាយទ្រព្យសម្បត្តិ និងបំណុលដែលបានប្រកាសរបស់អ្នកកាន់អំណាចនយោបាយចំនួន ១៨រូប នៅក្នុងរដ្ឋាភិបាលមុន។
ឧត្តមសេនីយ៍ ប្រាយុទ្ធ និងប្រពន្ធរបស់លោកឈ្មោះ ណារ៉ាផន បានរាយការណ៍ថា ទ្រព្យសម្បត្តិ ១៣០.២ លានបាតដោយគ្មានបំណុល ដែលមានន័យថា កើនឡើង ២៧,៩ លានបាតពីអ្វីដែលពួកគេបានប្រកាសកាលពីឆ្នាំ ២០១៤ នៅពេលគាត់ចូលកាន់តំណែងជានាយករដ្ឋមន្ត្រី។
ទ្រព្យសកម្មភាគច្រើនរបស់ឧត្តមសេនីយ៍ ប្រាយុទ្ធ មានតម្លៃ ៩៨,៦លានបាត គឺជាប្រាក់បញ្ញើធនាគារ ការវិនិយោគ ដីឡូតិ៍ចំនួនពីរ ឡានចំនួន ៤ មានតម្លៃ ១០,៧ លានបាត រួមទាំងរថយន្តម៉ាក Porsche Panamera មួយគ្រឿង ព្រមទាំងនាឡិកាដៃ៩, កាំភ្លើង៩ដើម និងកង់២គ្រឿង។ អតីតនាយករដ្ឋមន្ត្រីក៏បានរាយការណ៍ពីការបង់ពន្ធលើប្រាក់ចំណូលក្នុងឆ្នាំ ២០២២ ចំនួន ៣៤៣.៨១៤ បាត។
ទ្រព្យសម្បត្តិរបស់ភរិយាលោកសរុបចំនួន ៣១,៥លានបាត រួមមានប្រាក់សន្សំពីធនាគារ ដីចំនួន ៤ឡូត៍ រថយន្ត Toyota Alphard មួយគ្រឿង និងគ្រឿងមួយចំនួន។ លោកស្រីបានរាយការណ៍ពីប្រាក់ចំណូលប្រចាំឆ្នាំចំនួន ៤៥៣.៣៥១ បាត និងការចំណាយប្រចាំឆ្នាំចំនួន ៤០០.០០០ បាត៕ ប្រែសម្រួលៈ ណៃ តុលា
