បរទេស ៖ យោងតាមទិន្នន័យ ពីទីភ្នាក់ងារជាតិកិច្ចការងារ ស្ថិតិរបស់ប្រទេស រុស្សីហៅថា Rosstat ចេញផ្សាយ កាលពីថ្ងៃព្រហស្បតិ៍ម្សិលមិញ បានឲ្យដឹងថា អត្រានៃអ្នកអត់ការងារធ្វើនៅក្នុងប្រទេស រុស្ស៊ីបានធ្លាក់ចុះដល់២,៩ភាគរយ នៅក្នុងខែតុលា ។ តួលេខនេះគឺទាបបំផុត ចាប់តាំងពីដើមទសវត្សរ៍ឆ្នាំ១៩៩០មកម្ល៉េះ។
ទិន្នន័យបានបង្ហាញដែរថា កាលពីខែមុន មនុស្សប្រហែល២,២លាននាក់ ដែលមានអាយុពី១៥ឆ្នាំឡើង ទៅត្រូវបានចាត់ថ្នាក់ជាអ្នកអត់ការងារធ្វើ បើប្រៀបធៀបទៅនឹងជាមធ្យម២,៣លាននាក់សម្រាប់ត្រីមាសទីបីហើយបើធៀបនឹងតួលេខឆ្នាំមុន ចំនួនជនជាតិរុស្ស៊ី ដែលគ្មានការងារ ធ្វើបានថយចុះដល់ទៅ ២៣ភាគរយ។
គួរឲ្យដឹងដែរថាចំនួនមនុស្ស ដែលមានការងារធ្វើបានកើនឡើងដល់៧៤,១លាននាក់ កើនឡើងពី៧៤លាននាក់ កាលពីខែមុន និង ៧២,១លាននាក់ក្នុងខែតុលា ឆ្នាំ២០២២។អត្រាអត់ការងារធ្វើ នៅក្នុងប្រទេសឥឡូវនេះ បានធ្លាក់ចុះក្រោម៤ភាគរយគិត ចាប់តាំងពីខែឧសភា ឆ្នាំ២០២២។
ទោះជាយ៉ាងណាក៏ដោយ យោងតាមធនាគារ នៃប្រទេសរុស្ស៊ី អាជីវកម្មនានានៅតែបន្ត ទទួលរងពីកង្វះខាតកម្មករ ដែលជាការជួយរក្សាអត្រាខ្ពស់ នៃកំណើនប្រាក់ឈ្នួល ៕
ប្រែសម្រួល៖ស៊ុនលី
