តូក្យូ៖ អាជ្ញាធរជប៉ុនបានឲ្យដឹងថា បំណែកនៃយន្តហោះយោធា Osprey ដែលបានធ្លាក់ក្នុងដែនទឹក ភាគនិរតីនៃប្រទេសជប៉ុន ត្រូវបានប្រគល់ទៅឱ្យយោធាសហរដ្ឋអាមេរិកកាលពីថ្ងៃអាទិត្យ ខណៈដែលការស្វែងរកនៅជុំវិញ នៅតែបន្ត ដើម្បីស្វែងរកសមាជិកនាវិកចំនួន ៧នាក់ទៀតដែលបាត់ខ្លួន។
បំណែកបាក់បែកត្រូវបានប្រមូលដោយកប៉ាល់មកពីទីស្នាក់ការឆ្មាំសមុទ្រក្នុងតំបន់ទី១០ ក្នុងខេត្តកាហ្គោស៊ីម៉ា និងដោយអ្នកនេសាទមកពីទីប្រជុំជនយូគូស៊ីម៉ា បន្ទាប់ពីយន្តហោះ tilt-rotor បានធ្លាក់កាលពីថ្ងៃពុធក្នុងអំឡុងពេលសមយុទ្ធហ្វឹកហាត់នៅជិតទីប្រជុំជនកោះ។
ការប្រគល់បំណែកយន្តហោះ ដោយអនុលោមតាមកិច្ចព្រមព្រៀងស្ថានភាពកងកម្លាំងជប៉ុន-អាមេរិកមានន័យថា វានឹងមិនអាចអនុវត្តបានសម្រាប់ជប៉ុន ក្នុងការស៊ើបអង្កេតពីមូលហេតុនៃឧបទ្ទវហេតុនេះបាននោះទេ នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
សាកសពតែមួយគត់ដែលរកឃើញពីយន្តហោះត្រូវបានគេកំណត់អត្តសញ្ញាណថា ជាបុគ្គលិកលោក Jacob Galliher អាយុ ២៤ឆ្នាំ ជាប្រតិបត្តិករជំនួយផ្ទាល់ ដែលត្រូវបានចាត់ឱ្យទៅក្រុមស៊ើបការណ៍សម្ងាត់ទី៤៣ ដែលជាបញ្ជាការប្រតិបត្តិការពិសេសរបស់កងទ័ពអាកាសសហរដ្ឋអាមេរិក។
បញ្ជាការបានឲ្យដឹងថា ប្រតិបត្តិការស្វែងរក និងជួយសង្គ្រោះ ដែលធ្វើឡើងដោយសហការជាមួយកងកម្លាំងការពារជាតិជប៉ុន និងឆ្មាំឆ្នេរសមុទ្រ ក៏ដូចជាអ្នកស្ម័គ្រចិត្តស៊ីវិល កំពុងបន្ត ហើយនៅតែជាអាទិភាពកំពូល។ ប្រភពបានឲ្យដឹងថា នាវាផ្ទុកយន្តហោះអាមេរិក Carl Vinson ដែលស្លាបអាកាសរបស់ខ្លួន និងទ្រព្យសម្បត្តិផ្សេងទៀតដូចជាយានគ្មានមនុស្សបើក និងអ្នកមុជទឹកបានចូលរួម។
ឧត្តមសេនីយ Tony Bauernfeind មេបញ្ជាការប្រតិបត្តិការពិសេសរបស់កងទ័ពអាកាសបានឲ្យដឹងនៅក្នុងសេចក្តីថ្លែងការណ៍មួយថា “ការផ្តោតរបស់យើង គឺធ្វើឱ្យប្រតិបត្តិការស្វែងរក និងជួយសង្គ្រោះ២៤/៧ ដែលកំពុងបន្ត ខណៈពេលដែលយើងយកចិត្តទុកដាក់ ចំពោះគ្រួសារ និងមនុស្សជាទីស្រលាញ់ ដែលរងផលប៉ះពាល់ដោយឧបទ្ទវហេតុនេះ” ៕ ប្រែសម្រួល ឈូក បូរ៉ា
