ម៉ូស្គូ៖ វិមានក្រឹមឡាំងបានឲ្យដឹងថា ប្រធានាធិបតីរុស្ស៊ីលោក វ្ល៉ាឌីមៀ ពូទីន បានបញ្ជាក់កាលពីថ្ងៃសុក្រថា ផែនការរបស់លោកនឹងឈរឈ្មោះ សម្រាប់ការបោះឆ្នោតឡើងវិញ នៅឆ្នាំក្រោយ។
ការប្រកាសនេះត្រូវបានធ្វើឡើងក្នុងអំឡុងពេលសន្ទនាក្រៅផ្លូវការរវាងលោក ពូទីន និងអ្នកចូលរួម នៃប្រតិបត្តិការយោធាពិសេស របស់រុស្ស៊ី បន្ទាប់ពីពិធីមួយដែល លោកបានប្រគល់មេដាយមាសផ្កាយ ដល់វីរបុរសនៃប្រទេសរុស្ស៊ី។
វិមានក្រឹមឡាំងបានឲ្យដឹង ដោយដកស្រង់សំដីលោកពូទីនថា “ខ្ញុំនឹងមិនលាក់បាំងទេថា ខ្ញុំមានគំនិតផ្សេងៗគ្នានៅពេលផ្សេងៗគ្នា ប៉ុន្តែឥឡូវនេះអ្នកនិយាយត្រូវ ឥឡូវនេះដល់ពេលដែលត្រូវសម្រេចចិត្ត ខ្ញុំនឹងឈរឈ្មោះជាប្រធានាធិបតីនៃសហព័ន្ធរុស្ស៊ីបន្ដទៀត” ។
គួរបញ្ជាក់ថា កាលពីថ្ងៃព្រហស្បតិ៍ ក្រុមប្រឹក្សាសហព័ន្ធរុស្ស៊ី ឬសភាជាន់ខ្ពស់បានបោះឆ្នោតជាឯកច្ឆ័ន្ទ ដើម្បីរៀបចំការបោះឆ្នោតប្រធានាធិបតី បន្ទាប់នៅថ្ងៃទី ១៧ ខែមីនា ឆ្នាំ ២០២៤៕
ប្រែសម្រួល ឈូក បូរ៉ា
