វីយែន៖ អង្គការនៃប្រទេសនាំចេញប្រេង (OPEC) បានរក្សាការព្យាករណ៍ពីមុនរបស់ខ្លួន សម្រាប់កំណើនតម្រូវការប្រេងពិភពលោក ដែលមានសុខភាពល្អនៅឆ្នាំ២០២៤ ដោយបានស្តីបន្ទោសអ្នកប៉ាន់ស្មាន សម្រាប់ការធ្លាក់ចុះនៃតម្លៃប្រេងឆៅនាពេលថ្មីៗនេះ។
នៅក្នុងរបាយការណ៍ទីផ្សារប្រេងប្រចាំខែរបស់ខ្លួន សម្រាប់ខែធ្នូ OPEC មើលឃើញកំណើនតម្រូវការពិភពលោកចំនួន ២,២៥ លានបារ៉ែលក្នុងមួយថ្ងៃ សម្រាប់ឆ្នាំក្រោយ បន្ទាប់ពីកំណើនតម្រូវការ ២,៤៦លានបារ៉ែលក្នុងមួយថ្ងៃនៅក្នុងឆ្នាំនេះ ទាំងមិនផ្លាស់ប្តូរពីការព្យាករណ៍កាលពីខែមុន។
ដោយកត់សម្គាល់ថាវានៅតែមាន “សុទិដ្ឋិនិយមដោយប្រយ័ត្នប្រយែង” អំពីមូលដ្ឋានគ្រឹះនៃទីផ្សារប្រេងក្នុងឆ្នាំ២០២៤ អង្គការ OPEC បានឲ្យដឹងនៅក្នុងរបាយការណ៍ថា តម្រូវការប្រេងនៅឆ្នាំក្រោយត្រូវបានគេរំពឹងថា នឹងត្រូវបានគាំទ្រដោយ “កំណើន GDP សកល ដែលមានភាពធន់ ចំពេលមានការបន្តធ្វើឱ្យប្រសើរឡើងនៃសកម្មភាពសេដ្ឋកិច្ចនៅក្នុងប្រទេសចិន” ។
តម្លៃប្រេងបានធ្លាក់ចុះចាប់តាំងពីខែតុលា ដោយតម្លៃប្រេងឆៅ Brent អន្តរជាតិបានធ្លាក់ចុះមកនៅទាបបំផុត ៧០ដុល្លារក្នុងមួយបារ៉ែលពីកម្រិតខ្ពស់បំផុតនៅឆ្នាំនេះជាង ៩០ដុល្លារក្នុងមួយបារ៉ែលក្នុងខែកញ្ញា។ ការធ្លាក់ចុះនេះបានបន្តចាប់តាំងពី OPEC និងសម្ព័ន្ធមិត្តរបស់ខ្លួន ដែលជាក្រុមដែលគេស្គាល់ថាជា OPEC+ នៅថ្ងៃទី៣០ ខែវិច្ឆិកាបានប្រកាសពីជុំថ្មីនៃការកាត់បន្ថយផលិតកម្មសរុបចំនួន ២,២លានបារ៉ែលក្នុងមួយថ្ងៃ សម្រាប់ត្រីមាសទីមួយនៃឆ្នាំ២០២៤។
នៅក្នុងរបាយការណ៍កាលពីថ្ងៃពុធ អង្គការ OPEC បានស្តីបន្ទោសអ្នកវាយតម្លៃ និងការលក់យ៉ាងធ្ងន់ធ្ងររបស់ពួកគេ សម្រាប់ការជំរុញតម្លៃប្រេង ដោយថាអ្នកប្រមើលមើលបានកាត់បន្ថយ “ជំហរកើនឡើងរបស់ពួកគេយ៉ាងខ្លាំង ” ។
អង្គការនេះបានបន្ថែមថា “ភាពស្វាហាប់ទីផ្សារត្រូវបានជំរុញដោយការព្រួយបារម្ភហួសហេតុអំពីកំណើនតម្រូវការប្រេង ដែលជះឥទ្ធិពលអវិជ្ជមានដល់អារម្មណ៍ទីផ្សារ”៕ ប្រែសម្រួល ឈូក បូរ៉ា
