បរទេស៖ រដ្ឋមន្ត្រីការបរទេសអាល្លឺម៉ង់ បារាំង និងអង់គ្លេសបានអំពាវនាវ ឱ្យអ៊ីស្រាអែល បញ្ឈប់ការទម្លាក់គ្រាប់បែក នៅហ្គាហ្សា កាលពីថ្ងៃអាទិត្យ នៅក្នុងអត្ថបទវិចារណកថារួមគ្នាមួយ ដែលត្រូវបានបោះពុម្ពផ្សាយ នៅក្នុងកាសែត Sunday Times និង Welt am Sonntag ។
យោងតាមការដកស្រង់ ព័ត៌មានរបស់ RT បានឲ្យដឹងទៀតថាសមភាគីបារាំង របស់ពួកគេបានបន្ទរការទាមទារ ក្នុងអំឡុងពេលសន្និសីទសារព័ត៌មាន ជាមួយរដ្ឋមន្ត្រីការបរទេសអ៊ីស្រាអែល នៅថ្ងៃបន្ទាប់។
រដ្ឋមន្ត្រីការបរទេសអង់គ្លេស David Cameron និងរដ្ឋមន្ត្រីការបរទេសអាល្លឺម៉ង់ Annalena Baerbock បានសរសេរថា ជនស៊ីវិលជាច្រើននាក់ ត្រូវបានសម្លាប់។ រដ្ឋាភិបាលអ៊ីស្រាអែល គួរតែធ្វើអ្វីបន្ថែមទៀត ដើម្បីបែងចែកឱ្យដាច់ រវាងពួកភេរវករ និងជនស៊ីវិល ដោយធានាថាយុទ្ធនាការ របស់ខ្លួន មានគោលដៅទៅលើមេដឹកនាំ និងប្រតិបត្តិកររបស់ក្រុមហាម៉ាស់ប៉ុណ្ណោះ។
ដោយឡែក រដ្ឋមន្ត្រីការបរទេសបារាំង លោកស្រី Catherine Colonna ក៏បានជំរុញឱ្យមានបទឈប់បាញ់ ជាបន្ទាន់ផងដែរ ដើម្បីអនុញ្ញាតឱ្យ ដំណើរការឆ្ពោះទៅរកកិច្ចព្រមព្រៀង ដោះលែងចំណាប់ខ្មាំង អនុញ្ញាតឱ្យចូលប្រើប្រាស់ និងការផ្តល់ជំនួយមនុស្សធម៌បន្ថែមទៀត ដល់ប្រជាជនស៊ីវិល ដែលកំពុងរងទុក្ខវេទនា នៅតំបន់ហ្គាហ្សា និង ជាការពិត ដើម្បីឆ្ពោះទៅរកបទឈប់បាញ់ មនុស្សធម៌ និងការចាប់ផ្តើម នៃដំណោះស្រាយនយោបាយ ឡើងវិញ៕
ប្រែសម្រួល៖ស៊ុនលី
