បរទេស៖ ប្រទេសអាល្លឺម៉ង់ និង ប្រទេសលីទុយអានី កាលពីថ្ងៃចន្ទបានចុះហត្ថលេខា លើផែនទីបង្ហាញផ្លូវមួយសម្រាប់អ្វីដែល ត្រូវបានកំណត់ថា នឹងក្លាយជាការដាក់ពង្រាយកងទ័ពអាល្លឺម៉ង់ ដ៏ធំបំផុតនៅលើទឹកដីបរទេស ក្នុងយុគសម័យទំនើប។ នៅក្រោមផែនការនេះ គឺកងពលតូចដែលមានកម្លាំង ៥.០០០នាក់ នឹងត្រូវឈរជើងតិចជាង ២០ គីឡូម៉ែត្រ ពីព្រំដែនជាមួយបេឡារុស្ស ដែលជាសម្ព័ន្ធមិត្តដ៏សំខាន់របស់ទីក្រុងម៉ូស្គូ។
យោងតាមសារព័ត៌មាន RT ចេញផ្សាយនៅថ្ងៃទី១៨ ខែធ្នូ ឆ្នាំ២០២៣ បានឱ្យដឹងថា ប្រទេសលីទុយអានីក៏មានព្រំប្រទល់ជាប់នឹង តំបន់ភាគខាងលិចបំផុតរបស់រុស្ស៊ីគឺទីក្រុង Kaliningrad ។
កិច្ចព្រមព្រៀងនេះត្រូវបានផ្សាភ្ជាប់ ក្នុងអំឡុងពេលដំណើរទស្សនកិច្ច របស់រដ្ឋមន្ត្រីការពារជាតិអាល្លឺម៉ង់ Boris Pistorius ទៅកាន់ប្រទេសនៅតំបន់បាល់ទិក ជាកន្លែងដែលលោកបានជួប ជាមួយសមភាគីលីទុយអានីគឺ Arvydas Anusauskas ។ ទីក្រុងប៊ែរឡាំងបានដឹកនាំកម្លាំង ជំរុញពហុជាតិសាសន៍របស់អង្គការណាតូ ដែលឈរជើងនៅក្នុងប្រទេសនេះរួចហើយ ហើយបានសម្រេចចិត្តបង្កើនវត្តមាន យោធារបស់ខ្លួនកាលពីឆ្នាំមុន។
អាល្លឺម៉ង់គ្រោងនឹងរក្សាទាហានចំនួន ៤.៨០០ នាក់ និងអ្នកឯកទេសស៊ីវិល ២០០ នាក់ក្នុងប្រទេសជាមូលដ្ឋានអចិន្ត្រៃយ៍ ដោយមានសព្វាវុធធុនធ្ងន់ និងរចនាសម្ព័ន្ធគាំទ្រ។ ការផ្លាស់ទីលំនៅនឹង ចាប់ផ្តើមនៅត្រីមាសទីពីរនៃឆ្នាំ ២០២៤ ដោយកងពលតូចគ្រោងនឹងឈានដល់ ការត្រៀមខ្លួនប្រយុទ្ធពេញលេញនៅឆ្នាំ ២០២៧, នេះបើយោងតាមក្រសួងការពារជាតិអាល្លឺម៉ង់ ៕
ប្រែសម្រួលៈ ណៃ តុលា
