គៀវ៖ ឧបនាយករដ្ឋមន្ត្រីអ៊ុយក្រែនលោក Oleksandr Kubrakov បានឲ្យដឹងថា ការនាំចេញរបស់អ៊ុយក្រែន តាមរយៈ “ច្រករបៀងមនុស្សធម៌” នៅក្នុងសមុទ្រខ្មៅ បានឈានដល់ ១០លានតោន ចាប់តាំងពីខែសីហា។
ក្នុងអំឡុងពេលប្រតិបត្តិការនៃច្រករបៀងថ្មីនេះ នាវាចំនួន ៣០២គ្រឿង បានចាកចេញពីប្រទេសអ៊ុយក្រែន ខណៈដែល ៣៣៧គ្រឿង ចូលកំពង់ផែរបស់ប្រទេសនេះ។
យោងតាមការឲ្យដឹងពី ឧបនាយករដ្ឋមន្រ្តីរូបនេះបានឲ្យដឹងថា កប៉ាល់ទាំងនោះបានដឹកជញ្ជូនគ្រាប់ធញ្ញជាតិ និងទំនិញផ្សេងទៀតពីអ៊ុយក្រែន ទៅកាន់ប្រទេសចំនួន ២៤ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក Kubrakov បានលើកឡើងថា បច្ចុប្បន្នអ៊ុយក្រែន នាំចេញផលិតផលកសិកម្មប្រហែល ៥ លានតោនក្នុងមួយខែ តាមរយៈផ្លូវសមុទ្រជំនួស ខណៈដែលនៅក្នុងខែដំបូង នៃប្រតិបត្តិការច្រករបៀង ការនាំចេញទាំងនោះមានចំនួន ២៧៨,០០០ តោន។
កាលពីខែសីហា អ៊ុយក្រែន បានបង្កើត “ច្រករបៀងមនុស្សធម៌” សម្រាប់កប៉ាល់ដឹកទំនិញនៅសមុទ្រខ្មៅ ជាជម្រើសមួយ សម្រាប់គំនិតផ្តួចផ្តើមគ្រាប់ធញ្ញជាតិសមុទ្រខ្មៅ ដែលបានដួលរលំនៅក្នុងខែកក្កដា។
កាលពីសប្តាហ៍មុនលោក Kubrakov បានឲ្យដឹងថា ប្រតិបត្តិការនៃកំពង់ផែសមុទ្រខ្មៅអ៊ុយក្រែន អាចបន្ថែម ៨ ភាគរយ ដល់ផលិតផលក្នុងស្រុកសរុប របស់ប្រទេសនៅឆ្នាំក្រោយ ដោយការជំរុញការនាំចេញកសិកម្ម និងលោហធាតុរបស់អ៊ុយក្រែន ដែលបានថយចុះចាប់តាំងពី ការចាប់ផ្តើមនៃជម្លោះជាមួយរុស្ស៊ី ៕
ប្រែសម្រួល ឈូក បូរ៉ា
