ប្រធានាធិបតីអ៊ុយក្រែនថា ខាងយោធាស្នើសុំឱ្យប្រជាជនរហូតដល់ ៥០ម៉ឺននាក់ ចូលបម្រើកងទ័ព ក្នុងពេលប្រយុទ្ធជាមួយរុស្ស៊ី

បរទេស៖ ប្រធានាធិបតីអ៊ុយក្រែនលោក Volodymyr Zelenskyy បាននិយាយថា យោធារបស់អ៊ុយក្រែន គឺបានស្នើសុំប្រជាជនអ៊ុយក្រែនបន្ថែមពី ៤៥០.០០០នាក់ ទៅ ៥០០.០០០នាក់ ដើម្បីបំពេញបន្ថែមកងទ័ពរបស់ប្រទេស នៅពេលដែលអ៊ុយក្រែន ប្រយុទ្ធជាមួយប្រទេសរុស្ស៊ី។

យោងតាមសារព័ត៌មាន VOA ចេញផ្សាយនៅថ្ងៃទី១៩ ខែធ្នូ ឆ្នាំ២០២៣ បានឱ្យដឹងថា ក្នុងអំឡុងសន្និសីទសារព័ត៌មានចុងឆ្នាំនៅទីក្រុង គៀវ កាលពីថ្ងៃអង្គារ លោក Zelenskyy បាននិយាយថា មិនមានការសម្រេចចិត្តចុងក្រោយ ណាមួយត្រូវបានធ្វើឡើងលើសំណើនេះទេ ហើយថា មន្ត្រីរដ្ឋាភិបាលយោធាកំពូលនឹងពិភាក្សាអំពីបញ្ហានេះ។

លោកបាននិយាយថា “ខ្ញុំបាននិយាយថា ខ្ញុំនឹងត្រូវការទឡ្ហីករណ៍បន្ថែមទៀត ដើម្បីគាំទ្រដល់ការស្នើនេះ ពីព្រោះដំបូង វាគឺជាបញ្ហារបស់ប្រជាជន ។ ទីពីរ វាគឺជាបញ្ហានៃភាពយុត្តិធម៌។ វាជាបញ្ហានៃសមត្ថភាពការពារ ហើយវាជាបញ្ហានៃហិរញ្ញវត្ថុផងដែរ” ។

នៅទីក្រុងមូស្គូវិញ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានសរសើរកងកម្លាំងរបស់ប្រទេស របស់លោកចំពោះការវាយបកទៅលើ ការវាយប្រហារទ្រង់ទ្រាយធំរបស់អ៊ុយក្រែន ដែលបានចាប់ផ្តើមកាលពីខែមិថុនា។

លោកបាននិយាយនៅក្នុងកិច្ចប្រជុំមួយ កាលពីថ្ងៃអង្គារជាមួយមេដឹកនាំយោធាថា «កងទ័ពរបស់យើងកំពុង ធ្វើការផ្តួចផ្តើមគំនិតនេះ»។ “យើងកំពុងធ្វើយ៉ាងមានប្រសិទ្ធភាព នូវអ្វីដែលយើងគិតថាចាំបាច់ ធ្វើអ្វីដែលយើងចង់បាន”៕

ប្រែសម្រួលៈ ណៃ តុលា