បរទេស ៖ រដ្ឋមន្ត្រីក្រសួងឧស្សាហកម្ម និងពាណិជ្ជកម្មរុស្ស៊ី លោក Denis Manturov បាននិយាយ កាលពីថ្ងៃចន្ទថា ប្រទេសលោកខាងលិច កំពុងប៉ុនប៉ងលួចបច្ចេកវិទ្យា យោធារបស់ទីក្រុងម៉ូស្គូ ហើយកំពុងកំណត់គោលដៅ អ្នកជំនាញឧស្សាហកម្ម។
យោងតាមសារព័ត៌មាន RT ចេញផ្សាយនៅថ្ងៃទី២៦ ខែធ្នូ ឆ្នាំ២០២៣ បានឱ្យដឹងថា ក្នុងអំឡុងពេលបទសម្ភាសន៍ជាមួយទីភ្នាក់ងារសារព័ត៌មាន RIA Novosti លោក Manturov ត្រូវបានសួរថា តើមានករណីនៃការធ្វើចារកម្មឧស្សាហកម្មដោយ “បណ្តាប្រទេសដែលមិនរួសរាយរាក់ទាក់” ខណៈពេលដែលប្រទេសរុស្ស៊ី កំពុងបង្កើនផលិតកម្មការពារជាតិ។
លោក Denis Manturov បាននិយាយថា “នេះជាករណីកើតឡើងគ្រប់ពេល ។ វាកើតឡើងនៅថ្ងៃនេះ ហើយនឹងកើតឡើងនៅថ្ងៃស្អែកទៀត»។ មានការប្រមាញ់យ៉ាងសកម្មមិនត្រឹមតែសម្រាប់ការស្រាវជ្រាវ ដ៏ជោគជ័យ ទិន្នន័យ និងកម្រិតថេរនៃអាវុធរបស់យើងប៉ុណ្ណោះទេ ប៉ុន្តែថែមទាំងសម្រាប់អ្នកឯកទេស របស់យើងដែលមានតម្លៃ ជាពិសេសផងដែរ។”
រដ្ឋមន្ត្រីក្រសួងឧស្សាហកម្ម និង ពាណិជ្ជកម្មរុស្ស៊ីរូបនេះ បានបន្ថែមថា “វាមិនត្រឹមតែជាបញ្ហានៃចារកម្មប៉ុណ្ណោះទេ។ ខ្ញុំជឿថាអ្នកបានឃើញ របាយការណ៍ប្រព័ន្ធផ្សព្វផ្សាយដែលថា FSB បានរារាំងការប៉ុនប៉ងលើជីវិតរបស់អ្នកគ្រប់គ្រង កំពូលម្នាក់នៃក្រុមហ៊ុនការពារជាតិ»។
ទីភ្នាក់ងារសន្តិសុខរដ្ឋ ដ៏សំខាន់ របស់រុស្ស៊ីបានប្រកាសកាលពីសប្តាហ៍មុនថា ភ្នាក់ងាររបស់ខ្លួនបានឃាត់ខ្លួន ជនជាតិរុស្ស៊ីម្នាក់ ដែលត្រូវបានប្រគល់ភារកិច្ចដោយ “អង្គការភេរវករអ៊ុយក្រែន” ដើម្បីធ្វើឃាតអ្នកគ្រប់គ្រងឧស្សាហកម្មការពារ នៅផ្នែកកណ្តាលនៃប្រទេសរុស្ស៊ី៕
ប្រែសម្រួលៈ ណៃ តុលា
