បរទេស៖យោងតាមការចេញផ្សាយរបស់ RT រដ្ឋាភិបាល នៃក្រុងញូវដេលីនឹងចាត់វិធានការយ៉ាងតឹងរ៉ឹង ប្រឆាំងនឹងអ្នកដែលទទួលខុសត្រូវចំពោះការវាយប្រហារលើនាវាឈ្មួញ នៅឯឆ្នេរសមុទ្រឥណ្ឌា នៅថ្ងៃសុក្រនេះ រដ្ឋមន្ត្រីការពារជាតិ លោកRajnath Singh បានប្តេជ្ញាថា កងទ័ពជើងទឹកឥណ្ឌា បានបង្កើនការល្បាត ចំពេលមានភាពចលាចលនៅក្នុងតំបន់សមុទ្រក្រហម។
សេចក្តីថ្លែងការណ៍របស់រដ្ឋមន្ត្រីធ្វើឡើងបន្ទាប់ពីកងទ័ពជើងទឹកឥណ្ឌា បានប្រកាសថា ខ្លួនបានដាក់ពង្រាយនាវាពិឃាតមីស៊ីលនាំផ្លូវចំនួន៣ទៅកាន់សមុទ្រអារ៉ាប់ ដើម្បីរក្សាវត្តមានរារាំងបន្ទាប់ពីមានការវាយប្រហារ នៅក្នុងតំបន់ពាក់ព័ន្ធនឹងក្រុមឧទ្ទាម Houthi ។ គួរឲ្យដឹងដែរថា កងទ័ពជើងទឹកក៏កំពុងត្រួតពិនិត្យដែនទឹកតាមឆ្នេរសមុទ្រ ដោយប្រើយន្តហោះឈ្លបយកការណ៍ដែនសមុទ្រ P8I រយៈចម្ងាយឆ្ងាយផងដែរ៕ ប្រែសម្រួល៖ស៊ុនលី
