តេអេរ៉ង់៖ ទីភ្នាក់ងារសារព័ត៌មានរដ្ឋ IRNA របស់អ៊ីរ៉ង់ បានរាយការណ៍ថា ប្រទេសអ៊ីរ៉ង់ បានធ្វើការរៀបចំផ្នែកហិរញ្ញវត្ថុចំនួនពីរជាមួយប្រទេសរុស្ស៊ី ដើម្បីជួយសម្រួល ដល់ការនាំចូល របស់ខ្លួនពីទីក្រុងម៉ូស្គូ។
របាយការណ៍បានឲ្យដឹងថា កិច្ចព្រមព្រៀង ដែលរួមមានលិខិត ឥណទាន និងខ្សែឥណទានមួយ ត្រូវបានធ្វើឡើង ក្នុងអំឡុងដំណើរទស្សនកិច្ច របស់ប្រធានធនាគារកណ្តាលអ៊ីរ៉ង់ លោក Mohammad Reza Farzin ទៅកាន់ទីក្រុងម៉ូស្គូ។
IRNA បានចុះផ្សាយថា នៅក្រោមកិច្ចព្រមព្រៀងដំបូង ធនាគារ Sepah របស់អ៊ីរ៉ង់ បានបើកលិខិតឥណទាន ១៧ លានអឺរ៉ូ (១៨,៩លានដុល្លារអាមេរិក) នៅក្នុងប្រទេសរុស្ស៊ី ដើម្បីធានាការទូទាត់ សម្រាប់ការនាំចូលពីប្រទេសនេះ ។ លិខិតឥណទាន គឺជាវិធីបង់ប្រាក់ ដែលផ្តល់ការធានាសេដ្ឋកិច្ច ពីធនាគារទៅអ្នកនាំចេញ។
របាយការណ៍បានឲ្យដឹងថា នេះគឺជាលិខិតឥណទានដំបូង ដែលបើកដោយបណ្តាញធនាគាររបស់អ៊ីរ៉ង់ នៅក្រៅប្រទេស ចាប់តាំងពីសហរដ្ឋអាមេរិក បានដាក់ទណ្ឌកម្មឡើងវិញលើអ៊ីរ៉ង់ បន្ទាប់ពីបានដកខ្លួនចេញពីកិច្ចព្រមព្រៀងនុយក្លេអ៊ែរឆ្នាំ២០១៥ នៅក្នុងខែឧសភា ឆ្នាំ២០១៨ ដោយបន្ថែមថា វានឹងអនុញ្ញាតឱ្យពាណិជ្ជករអ៊ីរ៉ង់ ទិញទំនិញពីអ្នកផ្គត់ផ្គង់រុស្ស៊ី បានកាន់តែងាយស្រួល។
ក្រោមកិច្ចព្រមព្រៀងទីពីរ ធនាគារ Sberbank របស់រុស្ស៊ី និងធនាគារ Melli របស់អ៊ីរ៉ង់ បានព្រមព្រៀងគ្នាបង្កើតខ្សែឥណទានទំហំ ៦,៥ពាន់លានរូប្ល (ប្រហែល ៧០,៩១លានដុល្លារ) សម្រាប់ការនាំចូលទំនិញសំខាន់ៗ របស់អ៊ីរ៉ង់ ពីប្រទេសរុស្ស៊ី ដែលសម្រួលដល់ការចូលដំណើរ ការរបស់អ្នកនាំចេញអ៊ីរ៉ង់ ទៅកាន់ប្រាក់កម្ចីរុស្ស៊ី។ បន្ទាត់នៃឥណទាន គឺជាដែនកំណត់នៃការខ្ចីប្រាក់ ដែលបានកំណត់ជាមុន ដែលអាចប្រើម្តងហើយម្តងទៀត ។
របាយការណ៍បានឲ្យដឹងទៀតថា លោក Farzin ដែលបានដឹកនាំគណៈប្រតិភូបច្ចេកទេសបានមកដល់ទីក្រុងមូស្គូ កាលពីថ្ងៃអង្គារ សម្រាប់កិច្ចពិភាក្សា ស្តីពីការពង្រីកកិច្ចសហប្រតិបត្តិការរូបិយវត្ថុ និងធនាគារ និងការកែលម្អទំនាក់ទំនងជាមួយរុស្ស៊ី ក្រោមកិច្ចព្រមព្រៀងពាណិជ្ជកម្មសេរី ដែលចុះហត្ថលេខាដោយអ៊ីរ៉ង់ និងសហភាពសេដ្ឋកិច្ចអឺរ៉ាស៊ី កាលពីថ្ងៃចន្ទ៕
ប្រែសម្រួល ឈូក បូរ៉ា
