បរទេស៖ តារាសម្តែងហូលីវូដម្នាក់គឺ Christian Oliver និងកូនស្រីតូចពីរនាក់របស់លោកបានស្លាប់ បន្ទាប់ពីសាកសពចំនួន ៤នាក់ត្រូវបានរកឃើញពីយន្តហោះដែលបានធ្លាក់ចូលទៅក្នុងសមុទ្រនៅកោះ Caribbean កាលពីថ្ងៃព្រហស្បតិ៍។
យោងតាមសារព័ត៍មាន NBC NEWS ចេញផ្សាយនៅថ្ងៃទី៥ ខែមករា ឆ្នាំ២០២៤ បានឱ្យដឹងថា Christian Oliver អាយុ 51 ឆ្នាំ ដែលមានឈ្មោះពិតថា Christian Klepser ហើយធ្លាប់សម្តែងក្នុងរឿងដូចជា “Speed Racer” “The Good German” និង “Valkyrie” បានជិះលើយន្តហោះខ្នាតតូច នៅពេលដែលយន្តហោះនោះជួបការលំបាក និងបានចុះចតក្នុងមហាសមុទ្រ។ នេះបើយោងតាមប៉ូលិស Royal St. Vincent និងកងកម្លាំងប៉ូលីស Grenadines ។
ប៉ូលីសបាននិយាយថា ក្នុងចំណោមអ្នកស្លាប់មានកូនស្រីរបស់លោក Madita Klepser អាយុ ១០ ឆ្នាំ និង Annik Klepser អាយុ ១២ ឆ្នាំ រួមទាំងអ្នកបើកយន្តហោះ និង Robert Sachs ។
ប៉ូលីសបាននិយាយថា យន្តហោះដែលមានម៉ាស៊ីនតែមួយ ទើបតែបានហោះចេញពីកោះ Becquia ដែលជាកោះដ៏តូចមួយដែលពេញនិយមរបស់អ្នកទេសចរ និងជាផ្នែកមួយនៃប្រជាជាតិ Caribbean នៃ St. Vincent និង Grenadines បន្ទាប់ពីពេលថ្ងៃព្រហស្បតិ៍៕ ប្រែសម្រួលៈ ណៃ តុលា
