តូក្យូ៖ ក្រសួងដឹកជញ្ជូនបានប្រកាសពីវិធានការសុវត្ថិភាពសង្គ្រោះបន្ទាន់ បន្ទាប់ពីគ្រោះថ្នាក់យន្តហោះបុកគ្នា នៅអាកាសយានដ្ឋាន Haneda ទីក្រុងតូក្យូ ដោយបញ្ជាក់ពីព័ត៌មាន ដែលអ្នកត្រួតពិនិត្យចរាចរណ៍ផ្លូវអាកាសអាចផ្តល់ដល់យន្តហោះ ដើម្បីការពារការទំនាក់ទំនងមិនត្រឹមត្រូវណាមួយ។
នៅក្នុងឧបទ្ទវហេតុ ដែលបានកើតឡើងកាលពីមួយសប្តាហ៍មុន និងពាក់ព័ន្ធនឹងយន្តហោះដឹកអ្នកដំណើររបស់ក្រុមហ៊ុនអាកាសចរណ៍ជប៉ុនអ៊ែរឡាញ និងយន្តហោះឆ្មាំឆ្នេរសមុទ្រ អ្នកត្រួតពិនិត្យចរាចរណ៍ប៉ម បានប្រាប់យន្តហោះឆ្មាំឆ្នេរសមុទ្រថា វានឹងជា “លេខ ១” ដែលត្រូវហោះឡើង ដែលអាចនាំឱ្យប្រធានក្រុមសន្មត់ថា អាចចូលទៅក្នុងផ្លូវរត់ ដែលជាកន្លែងដែលគ្រោះថ្នាក់បានកើតឡើង។
នៅក្រោមជំហានសង្គ្រោះបន្ទាន់ អ្នកបញ្ជាមិនអាចប្រាប់យន្តហោះថាលេខមួយណានៅក្នុងជួរ ដែលពួកគេត្រូវហោះហើរ។ ព័ត៌មានបែបនេះត្រូវបានផ្តល់ជូន ដើម្បីជួយសម្រួលចរាចរណ៍ ប៉ុន្តែមិនមែនជាកាតព្វកិច្ចនោះទេ។
យោងតាមក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ បានឱ្យដឹងថា អាកាសយានដ្ឋាននឹងពង្រឹងការត្រួតពិនិត្យ ដើម្បីការពារការចេញចូលផ្លូវរត់ខុស ដោយចាត់តាំងបុគ្គលិកឱ្យត្រួតពិនិត្យជានិច្ច នូវអេក្រង់ ដែលជូនដំណឹងដល់បុគ្គលិក ប្រសិនបើយន្តហោះចូលផ្លូវរត់ ដែលត្រូវបានចាត់ឱ្យទៅយន្តហោះផ្សេងទៀតរួចហើយ ក្នុងអំឡុងពេលគ្រោះថ្នាក់កាលពីសប្តាហ៍មុន ការជូនដំណឹងមិនត្រូវបានគេកត់សម្គាល់ឡើយ។
រដ្ឋមន្ត្រីដឹកជញ្ជូនលោក Tetsuo Saito បានប្រាប់សន្និសីទសារព័ត៌មានថា “វាគឺជាបេសកកម្មដ៏សំខាន់របស់យើង ក្នុងការស្ដារឡើងវិញនូវទំនុកចិត្តលើអាកាសចរណ៍” ដោយកត់សម្គាល់ថា ក្រសួងរបស់គាត់គ្រោងនឹងបង្កើតវិធានការជាអចិន្ត្រៃយ៍ ដើម្បីការពារគ្រោះថ្នាក់ស្រដៀងគ្នានេះមិនឱ្យកើតឡើងម្តងទៀតបន្ទាប់ពីការស៊ើបអង្កេតគ្រោះថ្នាក់ និងការពិភាក្សា ដែលពាក់ព័ន្ធនឹងក្រុមអ្នកជំនាញ៕ ប្រែសម្រួល ឈូក បូរ៉ា
