តៃប៉ិ៖ អនុប្រធានាធិបតីតៃវ៉ាន់លោក Lai Ching-te ដែលជាប្រធានគណបក្សវឌ្ឍនភាពប្រជាធិបតេយ្យ ដែលកំពុងកាន់អំណាចបានប្រកាសជ័យជម្នះក្នុងការបោះឆ្នោតប្រធានាធិបតីកាលពីថ្ងៃសៅរ៍ ហើយបានប្តេជ្ញាការពារកោះ ដែលគ្រប់គ្រងដោយខ្លួនឯងមួយនេះ ពីការគំរាមកំហែងកាន់តែខ្លាំងឡើង ដែលបង្កឡើងដោយចិនដីគោក។
នៅក្នុងការប្រណាំងដែលត្រូវបានឃ្លាំមើលយ៉ាងដិតដល់ដោយពិភពលោក ចំពេលមានសម្ពាធឥតឈប់ឈររបស់ប្រទេសចិនលើកោះតៃវ៉ាន់ ជ័យជំនះរបស់លោក Lai មានន័យថា បក្ស DPP ទទួលបានអាណត្តិទី៣ រយៈពេល ៤ឆ្នាំជាប់ៗគ្នា ដែលជាជោគជ័យមិនធ្លាប់មានពីមុនមកក្នុងរយៈពេលចាប់តាំងពីការស្ទង់មតិអ្នកដឹកនាំដោយផ្ទាល់ត្រូវបានណែនាំក្នុងឆ្នាំ១៩៩៦ ។
គណៈកម្មាធិការរៀបចំការបោះឆ្នោតបាននិយាយថាចំនួនអ្នកទៅបោះឆ្នោតមានចំនួន ៧១,៩ ភាគរយ។ លោក Lai ទទួលបានសំឡេងគាំទ្រ ៤០ភាគរយ ហើយលោក Hou Yu-ih នៃគណបក្សជាតិនិយមដ៏សំខាន់ ទទួលបាន ៣៣,៥ ភាគរយ នេះបើយោងតាមលទ្ធផលចុងក្រោយដែលចេញផ្សាយដោយគណៈកម្មការ។ លោក Ko Wen-je នៃគណបក្សប្រជាជនតៃវ៉ាន់ ដែលជាកម្លាំងប្រឆាំងធំជាងគេទីពីរ ទទួលបាន ២៦,៥ ភាគរយ។
លោក Lai អាយុ ៦៤ឆ្នាំបានប្រាប់អ្នកគាំទ្ររបស់លោកនៅទីក្រុងតៃប៉ិថា “ក្នុងនាមជាប្រធានាធិបតី ខ្ញុំមានទំនួលខុសត្រូវដ៏សំខាន់មួយក្នុងការរក្សាសន្តិភាព និងស្ថិរភាពនៅច្រកសមុទ្រតៃវ៉ាន់” ។ “យើងក៏ប្តេជ្ញាការពារតៃវ៉ាន់ ពីការបន្តការគំរាមកំហែង និងការបំភិតបំភ័យពីប្រទេសចិន”។
ប្រទេសចិន ដែលដឹកនាំដោយកុម្មុយនិស្ត ដែលមានគោលបំណងនាំយកកោះនេះ ចូលទៅក្នុងការបង្រួបបង្រួមរបស់ខ្លួនដោយបង្ខំ ប្រសិនបើចាំបាច់ បានរិះគន់លោក Lai ថាជាអ្នកតស៊ូមតិឯករាជ្យ និងជា “អ្នកបង្កបញ្ហា”។ ភាគីទាំងពីរត្រូវបានគ្រប់គ្រងដោយឡែកពីគ្នាចាប់តាំងពីពួកគេបានបែកបាក់គ្នាក្នុងឆ្នាំ១៩៤៩ ដោយសារតែសង្គ្រាមស៊ីវិល៕ ប្រែសម្រួល ឈូក បូរ៉ា
