បរទេស៖ ក្រសួងការបរទេស របស់ប្រទេសចិន បានថ្កោលទោសរដ្ឋាភិបាល លោកខាងលិច ចំពោះការគោរពខ្លាំង ដល់ប្រធានាធិបតី ដែលគាំទ្រឯករាជ្យរបស់កោះតៃវ៉ាន់ លោក ឡៃ ឆឹងតេ បន្ទាប់ពីលោកទទួលបានជ័យជំនះ ក្នុងការបោះឆ្នោតនាពេលថ្មីៗនេះ។ ទីក្រុងប៉េកាំងបានព្រមានថា លោកខាងលិច មិនគួរ “ជ្រៀតជ្រែកក្នុងកិច្ចការផ្ទៃក្នុងរបស់ចិនទេ” និងថា តាមរយៈការសរសើរប្រធានាធិបតី ជាប់ឆ្នោតរបស់កោះតៃវ៉ាន់ លោក ឡៃ ឆឹងតេ គឺ សហរដ្ឋអាមេរិក និងសម្ព័ន្ធមិត្តកំពុងលើកទឹកចិត្ត កងកម្លាំងបំបែកខ្លួនហើយ ។
យោងតាមសារព័ត៌មាន RT ចេញផ្សាយនៅថ្ងៃទី១៤ ខែមករា ឆ្នាំ២០២៤ បានឱ្យដឹងថា លោក ឡៃ ឆឹងតេ នៃគណបក្សវឌ្ឍនភាពប្រជាធិបតេយ្យ (DPP) ដែលកំពុងកាន់អំណាចរបស់កោះតៃវ៉ាន់ ត្រូវបានបោះឆ្នោតជ្រើសរើសជាមេដឹកនាំថ្មីរបស់កោះគ្រប់គ្រងដោយខ្លួនឯងមួយនេះកាលពីថ្ងៃសៅរ៍។ លោក ឡៃ ឆឹងតេ ដែលចាត់ទុកកោះតៃវ៉ាន់ជា “ប្រជាជាតិប្រទេសឯករាជ្យ និងអធិបតេយ្យភាពរួចហើយ” នោះ គឺបានប្តេជ្ញាថា នឹងកសាងការការពាររបស់កោះនេះ ដើម្បីទប់ទល់នឹង អ្វីដែលលោកហៅថា “ការបន្តគំរាមកំហែង និងបំភិតបំភ័យពីប្រទេសចិន” ។
ភ្លាមៗបន្ទាប់ពីលោក ឡៃ ឆឹងតេ ត្រូវបានប្រកាសថា បានទទួលជ័យជំនះមកនោះ រដ្ឋមន្ត្រីការបរទេសអាមេរិក លោក Antony Blinken បានផ្ញើសារអបអរសាទរទៅកាន់ ទីក្រុងតៃប៉ិ។ សាររបស់ Blinken បានសរសេរថា “យើងទន្ទឹងរង់ចាំធ្វើការជាមួយបណ្ឌិត ឡៃ និងមេដឹកនាំ របស់កោះតៃវ៉ាន់ នៃគ្រប់ភាគី ដើម្បីជំរុញផលប្រយោជន៍ និងតម្លៃរួមរបស់យើង និងដើម្បីបន្តទំនាក់ទំនងក្រៅផ្លូវការដ៏យូរអង្វែងរបស់យើង ស្របតាមគោលនយោបាយចិនតែមួយរបស់សហរដ្ឋអាមេរិក” ។
ក្រោមគោលការណ៍ “ចិនតែមួយ” ទីក្រុងវ៉ាស៊ីនតោនទទួលស្គាល់ ប៉ុន្តែមិនគាំទ្រអធិបតេយ្យភាពរបស់ទីក្រុងប៉េកាំងលើកោះតៃវ៉ាន់នោះទេ។ ថ្លែងទៅកាន់អ្នកសារព័ត៌មាន នៅព្រឹកថ្ងៃសៅរ៍នេះ ប្រធានាធិបតីអាមេរិក Joe Biden បានសង្កត់ធ្ងន់ថា អាមេរិកមិនគាំទ្រ ឯករាជ្យភាពសម្រាប់កោះតៃវ៉ាន់ទេ៕
ប្រែសម្រួលៈ ណៃ តុលា
