បរទេស៖ កងឆ្មាំបដិវត្តន៍ឥស្លាមបាននិយាយថា ខ្លួនបានប្រើកាំជ្រួចផ្លោងប្រឆាំងនឹង មូលដ្ឋានពួកភេរវករ ISIS នៅក្នុងប្រទេសស៊ីរី និងជាទីតាំងរឹងមាំនៃសេវាកម្មចារកម្មអ៊ីស្រាអែល Mossad នៅក្នុងប្រទេសអ៊ីរ៉ាក់កាលពីថ្ងៃចន្ទ ដើម្បីជាការសងសឹកចំពោះការទម្លាក់គ្រាប់បែក របស់ភេរវករនាពេលថ្មីៗនេះនៅក្នុងប្រទេសអ៊ីរ៉ង់។
យោងតាមសារព័ត៌មាន RT ចេញផ្សាយនៅថ្ងៃទី១៥ ខែមករា ឆ្នាំ២០២៤ បានឱ្យដឹងថា ការផ្ទុះចំនួនពីរបានសម្លាប់មនុស្សជិត ១០០ នាក់នៅទីក្រុង គើម៉ាន់ កាលពីថ្ងៃទី ៣ ខែមករា ខណៈដែលអ្នកធម្មយាត្រា បានប្រមូលផ្តុំគ្នាដើម្បីគោរពដល់អតីតឧត្តមសេនីយ Qassem Soleimani របស់អ៊ីរ៉ង់ ដែលត្រូវបានសម្លាប់ ដោយសហរដ្ឋអាមេរិកក្នុងឆ្នាំ២០២១ ។ ក្រុមរដ្ឋអ៊ីស្លាម (IS ឬហៅកាត់ថា ISIS) បានអះអាងទទួលខុសត្រូវ លើការវាយប្រហារនេះ។ កាលពីខែមុន ការបំផ្ទុះគ្រាប់បែកអត្តឃាតមួយទៀតនៅក្រុង Rask បានសម្លាប់ប៉ូលិសអ៊ីរ៉ង់ ១១នាក់។ ការបំផ្ទុះនេះត្រូវបាន ស្តីបន្ទោសទៅលើក្រុម Jaish Al-Adl ដែលមានមូលដ្ឋាននៅប៉ាគីស្ថាន។
កងឆ្មាំបដិវត្តន៍ឥស្លាម បាននិយាយនៅក្នុងសេចក្តីថ្លែងការណ៍មួយថា “ដើម្បីឆ្លើយតបទៅនឹងឧក្រិដ្ឋកម្មថ្មីៗនេះ របស់ក្រុមភេរវករដែលបានធ្វើទុក្ករកម្ម ដោយអយុត្តិធម៌ក្រុមនៃជនរួមជាតិ ជាទីស្រឡាញ់របស់យើងនៅទីក្រុង គើម៉ាន់ និង Rask យើងបានកំណត់កន្លែងប្រមូលផ្តុំ របស់មេបញ្ជាការនិងធាតុនៃក្រុម ISIS ទាក់ទងនឹងប្រតិបត្តិការភេរវករនាពេលថ្មីៗនេះនៅក្នុងទឹកដីដែលកាន់កាប់នៃប្រទេសស៊ីរីហើយបានបំផ្លាញពួកគេដោយការបាញ់មីស៊ីលផ្លោងជាច្រើនគ្រាប់។
នៅក្នុងសេចក្តីថ្លែងការណ៍បន្តបន្ទាប់ IRGC បាននិយាយថា ខ្លួនក៏បានប្រើកាំជ្រួចប្រឆាំងនឹង “ទីស្នាក់ការកណ្តាលចារកម្មដ៏សំខាន់មួយនៃរបប Zionist (Mossad) នៅក្នុងតំបន់ឃើដ នៃប្រទេសអ៊ីរ៉ាក់ ផងដែរ” ។
មូលដ្ឋានដែលគេសង្ស័យថា ចារកម្ម Mossad ស្ថិតនៅក្បែរស្ថានកុងស៊ុលអាមេរិកក្នុងទីក្រុង អេប៊ីល ដែលនាំឱ្យមានការរាយការណ៍ខុសថា អាមេរិកត្រូវជាគោលដៅ។
ប្រភពសន្តិសុខអ៊ីរ៉ាក់បានប្រាប់ ABC News ថា មនុស្ស ៤នាក់ត្រូវបានសម្លាប់នៅទីក្រុង អេប៊ីល ប៉ុន្តែមិនមានទាហានអាមេរិកណាម្នាក់ ក្នុងចំណោមអ្នកស្លាប់នោះទេ។ ប្រភពដដែលបាននិយាយថា “ទីតាំងចំនួនប្រាំបី” នៅជិតស្ថានកុងស៊ុលសហរដ្ឋអាមេរិក គឺត្រូវបានវាយប្រហារ ៕
ប្រែសម្រួលៈ ណៃ តុលា
