បរទេស៖ ប្រទេសជប៉ុននឹងស្វែងរកសម្ព័ន្ធមិត្តដែលមានគំនិតដូចគ្នា ជាមួយប្រធានាធិបតីជាប់ឆ្នោតរបស់កោះតៃវ៉ាន់លោក ឡៃ ឆឹងតេ ដោយសង្ឃឹមថានឹងបង្កើតទំនាក់ទំនងកាន់តែរឹងមាំជាមួយទីក្រុងតូក្យូ ខណៈដែលភាគីទាំងពីរសម្លឹងមើលយ៉ាងប្រុងប្រយ័ត្នចំពោះបំណងរបស់ចិននៅលើកោះដែលគ្រប់គ្រងដោយខ្លួនឯងមួយនេះ។
យោងតាមសារព័ត៌មាន Japan Times ចេញផ្សាយកាលពីថ្ងៃទី១៥ ខែមករា ឆ្នាំ២០២៤ បានឱ្យដឹងថា លោក ឡៃ បានពណ៌នាការឈ្នះរបស់លោកនៅក្នុងការបោះឆ្នោតកាលពីថ្ងៃសៅរ៍ថាជា “ជ័យជម្នះសម្រាប់សហគមន៍ប្រជាធិបតេយ្យ” ហើយជាសញ្ញាថារដ្ឋបាលរបស់លោកនឹងស្វែងរកកិច្ចសហប្រតិបត្តិការឱ្យកាន់តែស៊ីជម្រៅជាមួយប្រទេសជប៉ុនដោយជួបជាមួយឯកអគ្គរដ្ឋទូតស្របច្បាប់របស់ទីក្រុងតូក្យូ និងសមាជិកសភាជប៉ុនមួយរូប ថ្ងៃបន្ទាប់ពីការបោះឆ្នោតនៅទីក្រុងតៃប៉ិ។
ប្រធានសមាគមប្តូររូបយវត្ថុជប៉ុន-តៃវ៉ាន់ លោក Mitsuo Ohashi បានជួបពិភាក្សាជាមួយលោក ឡៃ និងមិត្តរួមដំណែងគឺលោក Hsiao Bi-khim អតីតបេសកជនកំពូលរបស់កោះតៃវ៉ាន់ប្រចាំសហរដ្ឋអាមេរិក នៅទីស្នាក់ការកណ្តាលនៃគណបក្សវឌ្ឍនភាពប្រជាធិបតេយ្យដែលកំពុងកាន់អំណាចរបស់កោះតៃវ៉ាន់ ដោយប្រធានាធិបតីជាប់ឆ្នោតរូបនេះបានកត់សម្គាល់ថា ប្រទេសជិតខាងទាំងពីរគឺ “ព្រួយបារម្ភអំពីសន្តិភាព និងស្ថិរភាពក្នុងតំបន់” ។
ប្រទេសចិនបានអះអាងថា កោះតៃវ៉ាន់ ជាខេត្តក្បត់ដែលត្រូវតែរួបរួមជាមួយដីគោកដោយកម្លាំងប្រសិនបើចាំបាច់។ គោលនយោបាយនេះបានបង្កឱ្យមានការព្រួយបារម្ភអំពីការឈ្លានពានដែលអាចធ្វើទៅបានដោយប្រទេសចិន បើទោះបីជាប្រធានាធិបតីសហរដ្ឋអាមេរិកលោក Joe Biden ព្រមានថា សហរដ្ឋអាមេរិកនឹងជួយកោះតៃវ៉ាន់ក្នុងផ្នែកយោធាក្នុងករណីមានជម្លោះក៏ដោយ៕ ប្រែសម្រួលៈ ណៃ តុលា
