ប៉េកាំង៖ ទោះបីជាសេដ្ឋកិច្ចពិភពលោក កំពុងប្រឈមមុខនឹងកំណើនយឺត និងបញ្ហាប្រឈមជាច្រើនក៏ដោយ មេដឹកនាំធុរកិច្ច ដែលចូលរួមក្នុងកិច្ចប្រជុំប្រចាំឆ្នាំលើកទី៥៤ នៃវេទិកាសេដ្ឋកិច្ចពិភពលោក (WEF) នៅតែមានទំនុកចិត្តលើការរំពឹងទុកនៃសេដ្ឋកិច្ចចិន។
ប៉ុន្មានឆ្នាំចុងក្រោយនេះ ប្រទេសចិនគឺជាក្បាលម៉ាស៊ីន ដ៏សំខាន់សម្រាប់សេដ្ឋកិច្ចពិភពលោក។ យោងតាមទិន្នន័យពីការិយាល័យស្ថិតិជាតិរបស់ចិន (NBS) ចេញផ្សាយកាលពីថ្ងៃពុធ បានឱ្យដឹងថា ផលិតផលក្នុងស្រុកសរុប (GDP) របស់ប្រទេសចិន បានបង្ហាញពីកំណើន ៥,២ ភាគរយពីមួយឆ្នាំទៅមួយឆ្នាំក្នុងឆ្នាំ២០២៣ ដែលខ្ពស់ជាងគោលដៅប្រចាំឆ្នាំប្រហែល ៥ភាគរយ។ GDP របស់ប្រទេសនេះ បានឈានដល់កំណត់ត្រា ១២៦,០៦ពាន់ពាន់លានយន់ (ប្រហែល ១៧,៧១ពាន់ពាន់លានដុល្លារ) ក្នុងឆ្នាំ២០២៣។
នាយកមូលនិធិរូបិយវត្ថុអន្តរជាតិ (IMF) លោកស្រី Kristalina Georgieva បានឲ្យដឹងថា “សេដ្ឋកិច្ចចិន បានសម្រេចគោលដៅជាតិ ដែលត្រូវបានកំណត់ប្រហែល ៥ភាគរយ ហើយពិតជាលើសពីវា។ នោះគឺជាដំណឹងល្អ សម្រាប់ប្រទេសចិន ហើយក៏ជាដំណឹងដ៏ល្អសម្រាប់អាស៊ី និងពិភពលោកផងដែរ ពីព្រោះប្រទេសចិន ផ្តល់នូវកំណើនមួយភាគបីនៃពិភពលោក”។
ទោះបីជាមានភាពតានតឹងផ្នែកភូមិសាស្រ្តនយោបាយនាពេលបច្ចុប្បន្ន និងកំណើនសេដ្ឋកិច្ចយឺតក៏ដោយ ប្រធាន ABB លោក Peter Voser បានឲ្យដឹងថា លោកនៅតែមានទំនុកចិត្តលើប្រទេសចិន។ លោកបានបន្ថែមថា ABB មិនមានផែនការផ្លាស់ប្តូរយុទ្ធសាស្រ្តណាមួយនៅក្នុងប្រទេសនោះទេ។
ក្រុមហ៊ុនចម្រុះជាតិសាសន៍ធំៗជាច្រើន បាននិងកំពុងចាប់យកឱកាសយ៉ាងសកម្ម ដែលបង្កើតឡើងដោយទីផ្សារអ្នកប្រើប្រាស់ដ៏ធំរបស់ប្រទេសចិន។ ប៉ុន្មានឆ្នាំមកនេះ ការវិនិយោគបរទេសនៅក្នុងទីផ្សារចិន ទទួលបានភាពជោគជ័យយ៉ាងខ្លាំង ហើយអ្នកវិនិយោគបរទេសក៏មានទំនុកចិត្តលើការអភិវឌ្ឍន៍សេដ្ឋកិច្ចរបស់ប្រទេសចិនផងដែរ៕ ប្រែសម្រួល ឈូក បូរ៉ា
