បរទេស៖ យោងតាមការចេញផ្សាយរបស់ RT ប្រមុខមេដឹកនាំកិច្ចការងារ គោលនយោបាយ ការបរទេស របស់សហភាពអឺរ៉ុប លោក Josep Borrell បានប្រកាសកាលពីថ្ងៃចន្ទ បន្ទាប់ពីកិច្ចប្រជុំថ្នាក់រដ្ឋមន្ត្រីនៅទីក្រុងប្រ៊ូសែល រដ្ឋមន្ត្រីការបរទេសនៃសហភាពអឺរ៉ុប បានឈានដល់កិច្ចព្រមព្រៀង បណ្តោះអាសន្នមួយ ដើម្បីចាប់ផ្តើមបេសកកម្ម កងទ័ពជើងទឹក នៅសមុទ្រក្រហម។
អាល្លឺម៉ង់ បារាំង និងអ៊ីតាលី បានស្នើសុំដើម្បីធ្វើការឆ្លើយតប ទៅនឹងសំណើពីប្រទេសហូឡង់ ដែលការដឹកជញ្ជូនទំនិញរបស់ឈ្មួញ ត្រូវបានរងផលប៉ះពាល់ ដោយការវាយប្រហាររបស់ Houthi អស់រយៈពេលជាច្រើនខែ មកលើនាវា ហើយវាក៏ជាបញ្ហាដែលមានការតភ្ជាប់ ជាមួយនឹងអ៊ីស្រាអែលដែរ។
លោក Borrell បានថ្លែងបែបនេះនៅបន្ទាប់ពីកិច្ចប្រជុំនេះទៀតដែរថា ៖ យើងបានយល់ព្រមជាគោលការណ៍ ដើម្បីចាប់ផ្តើមបេសកកម្ម សហភាពអឺរ៉ុប នៅសមុទ្រក្រហមហើយឥឡូវនេះ យើងត្រូវតែធ្វើការដោយឯកច្ឆ័ន្ទថា នៅពេលណានឹងចាប់ផ្តើមបេសកកម្មនេះ។
គួរឲ្យដឹងដែរថាក្រុម Houthis ដែលគ្រប់គ្រងផ្នែកខាងលិច នៃប្រទេសយេមែន បានប្រកាសកាលពីខែតុលាថា ពួកគេនឹងរារាំងនាវា ណាមួយដែលមានទំនាក់ទំនង ជាមួយអ៊ីស្រាអែល នៅក្នុងសមុទ្រក្រហម ដោយសាមគ្គីភាពជាមួយប៉ាឡេស្ទីន នៅតំបន់ហ្គាហ្សា៕
ប្រែសម្រួល៖ស៊ុនលី
