ប៉េកាំង៖ ធនាគារកណ្តាល របស់ប្រទេសចិនបានឲ្យដឹងថា ខ្លួននឹងកាត់បន្ថយចំនួនសាច់ប្រាក់ ដែលធនាគារត្រូវតែរក្សា ទុកជាទុនបម្រុងចាប់ពីថ្ងៃទី០៥ ខែកុម្ភៈ ជាវិធានការបន្ធូរបន្ថយរូបិយវត្ថុដើម្បីទប់ទល់នឹងការធ្លាក់សនៃសេដ្ឋកិច្ច ចំពេលមានវិបត្តិវិស័យអចលនទ្រព្យ។
លោក Pan Gongsheng ទេសាភិបាលធនាគារ ប្រជាជនចិន បានឲ្យដឹងនៅក្នុងសន្និសីទ សារព័ត៌មានថា សមាមាត្រតម្រូវការទុនបម្រុង នឹងត្រូវបានបន្ទាប ០,៥ភាគរយដើម្បីបូមសាច់ ប្រាក់ប្រហែល ១ពាន់ពាន់លានយន់ (១៤០ពាន់លានដុល្លារ) ទៅក្នុងសេដ្ឋកិច្ច បន្ទាប់ពី ការកាត់បន្ថយ សមាមាត្រតម្រូវការ បម្រុងជាមធ្យម សម្រាប់ស្ថាប័នហិរញ្ញវត្ថុ នឹងមាន ៧ ភាគរយ។
វានឹងជាការកាត់បន្ថយអនុបាតលើកដំបូងនៅឆ្នាំនេះ បន្ទាប់ពីការកាត់បន្ថយ ០,២៥ ពិន្ទុក្នុងខែកញ្ញា។ ជំហាននេះត្រូវបានគេរំពឹងថានឹងជំរុញការប្រើប្រាស់ និងការវិនិយោគក្នុងស្រុកដោយជំរុញឱ្យស្ថាប័នហិរញ្ញវត្ថុផ្តល់ប្រាក់កម្ចីបន្ថែមទៀតដល់ក្រុមហ៊ុន និងអង្គភាពផ្សេងទៀត។
សេដ្ឋកិច្ចធំបំផុតទីពីរ របស់ពិភពលោក បាននឹងកំពុងធ្លាក់ចុះ ដោយវិស័យអចលនទ្រព្យ របស់ខ្លួននៅតែបន្តរង ផលប៉ះពាល់ដោយបញ្ហា ដែលឃើញក្រុមហ៊ុនអភិវឌ្ឍន៍ធំៗ China Evergrande Group និង Country Garden Holdings Co. ប្រឈមនឹងបំណុលដ៏ច្រើន ។
ទីផ្សារអចលនទ្រព្យមានប្រហែល ៣០ភាគរយ នៃផលិតផលក្នុង ស្រុកសរុប របស់ប្រទេសចិន ។ ប្រទេសនេះក៏ប្រឈម មុខនឹង បញ្ហាសេដ្ឋកិច្ចផ្សេងទៀតផងដែរ ដូចជាភាពអត់ការងារ ធ្វើរបស់យុវជនខ្ពស់ កាត់បន្ថយតម្រូវការខាងក្រៅ និងបំណុលរដ្ឋាភិបាល ក្នុងតំបន់កើនឡើង ៕
ប្រែសម្រួល ឈូក បូរ៉ា
