បរទេស៖ យោងតាមការចេញផ្សាយរបស់ RT ចំនួនអ្នកស្លាប់ដោយសារការវាយប្រហារដោយមីស៊ីលមួយគ្រាប់របស់អ៊ុយក្រែនទៅលើទីក្រុង Lisichansk ក្នុងទឹកដីសាធារណរដ្ឋប្រជាមានិត Lugansk (LPR) នៃប្រទេសរុស្ស៊ីបានកើនឡើងដល់ ២៨នាក់ហើយ ។
ការវាយប្រហារលើហាងនំប៉័ងមួយបានកើតឡើងក្នុងអំឡុងពេលដ៏មមាញឹកកាលពីថ្ងៃសៅរ៍ ដោយបានបំផ្លាញផ្នែកខ្លះនៃអគារ។ប្រភពនៅក្នុងគណៈកម្មាធិការស៊ើបអង្កេតរបស់រុស្ស៊ីបានប្រាប់ប្រព័ន្ធផ្សព្វផ្សាយថាការទម្លាក់គ្រាប់បែកនេះទំនងជាធ្វើឡើងជាមួយនឹងការប្រើប្រាស់ប្រព័ន្ធបាញ់គ្រាប់រ៉ុក្កែតច្រើនប្រភេទ HIMARS ផលិតដោយសហរដ្ឋអាមេរិក ដែលផ្គត់ផ្គង់ដល់ទីក្រុងគៀវដោយលោកខាងលិច។
ប្រធានស្តីទីនៃសាធារណរដ្ឋ LPR លោក Leonid Pasechnik បានសរសេរនៅលើ Telegram កាលពីថ្ងៃអាទិត្យថា៖ជាលទ្ធផលនៃការវាយប្រហារលើហាងនំប៉័ងមួយដោយអ្នកជាតិនិយមអ៊ុយក្រែន ជនស៊ីវិល២៨នាក់ត្រូវបានសម្លាប់ក្នុងនោះមានកុមារម្នាក់ផងដែរ ។
ក្រសួងទទួលបន្ទុកកិច្ចការងារគ្រាអាសន្នរុស្ស៊ី បានផ្តល់តួលេខស្រដៀងគ្នា នៃអ្នកស្លាប់និងរបួស។ ក្រុមអ្នកជួយសង្គ្រោះបានធ្វើការនៅនឹងកន្លែងពេញមួយយប់ ដោយបានរុះរើ៦៥ភាគរយ នៃអគារដែលរងការខូចខាត ដោយបន្ថែមប្រតិបត្តិការស្វែងរក និងជួយសង្គ្រោះនៅតែបន្ត៕ ប្រែសម្រួល៖ស៊ុនលី
