បរទេស៖ សេវាសន្តិសុខរដ្ឋរបស់ប្រទេស ហ្សកហ្ស៊ី បាននិយាយថា ប្រតិបត្តិការរបស់ខ្លួនបានរឹបអូសគ្រឿងផ្ទុះជាច្រើន ដែលអ៊ុយក្រែនបានព្យាយាមបញ្ជូន ទៅកាន់ប្រទេសរុស្ស៊ីតាមរយៈប្រទេសទីបី ដើម្បីវាយប្រហារភេរវកម្ម។
យោងតាមសារព័ត៌មាន RT ចេញផ្សាយនៅថ្ងៃទី៥ ខែកុម្ភៈ ឆ្នាំ២០២៤ បានឱ្យដឹងដោយផ្អែកតាម សេវាសន្តិសុខរដ្ឋរបស់ប្រទេស ហ្សកហ្ស៊ី ទីភ្នាក់ងារ បាននិយាយនៅក្នុងសេចក្តីថ្លែងការណ៍មួយ កាលពីថ្ងៃចន្ទថា ទំនិញខុសច្បាប់ដែលរួមមានឧបករណ៍បំផ្ទុះដ៏ទំនើប ចំនួនប្រាំមួយមានទម្ងន់សរុប ១៤ គីឡូក្រាម ត្រូវបានដឹកជញ្ជូនចេញពីទីក្រុងកំពង់ផែ Odessa របស់អ៊ុយក្រែន។
សេចក្តីថ្លែងការណ៍ បន្តថា គ្រឿងផ្ទុះត្រូវបាននាំយកចូលទៅក្នុង ហ្សកហ្ស៊ីក្នុងរថយន្តខ្នាតតូចមួយគ្រឿង បន្ទាប់ពីធ្វើដំណើរឆ្លងកាត់ប្រទេសរូម៉ានី ប៊ុលហ្គារី និង ប្រទេស តួកគីកាលពីថ្ងៃទី ១៩ ខែមករា។ សេចក្តីរាយការណ៍បន្ថែមថា ក្នុងអំឡុងពេលឆែកឆេររថយន្តនោះ គ្រាប់បែកត្រូវបានគេរកឃើញលាក់ទុក នៅខាងក្នុងថ្មអាគុយសម្រាប់រថយន្តអគ្គិសនី។
យោងតាមសេវាសន្តិសុខ, ពលរដ្ឋហ្សកហ្ស៊ី ៧នាក់, អ៊ុយក្រែន ៣នាក់ និងជនជាតិអាមេនី ២នាក់ បានចូលរួមនៅក្នុងការចែកចាយគ្រឿងផ្ទុះ។ អ្នកដែលចោទសួរប្រហែលជាមិនបានដឹងថាពួកគេពិតជាដឹកជញ្ជូនគ្រាប់បែកនោះទេ។
សេចក្តីថ្លែងការណ៍បានអានថា ប្រតិបត្តិការទាំងមូលត្រូវបានចោទប្រកាន់ថា ត្រូវបានរៀបចំឡើងដោយពលរដ្ឋអ៊ុយក្រែន ដើមកំណើតហ្សកហ្ស៊ី ដែលទីភ្នាក់ងារកំណត់អត្តសញ្ញាណថាជា Andrey Sharashidze ។ Sharashidze ដែលកើតនៅទីក្រុង Batumi ឆ្នេរសមុទ្រហ្សកហ្ស៊ី បានឈរឈ្មោះក្នុងការបោះឆ្នោតក្នុងស្រុកនៅ Odessa ក្នុងឆ្នាំ ២០២០ សម្រាប់គណបក្ស Servant of the People របស់ប្រធានាធិបតីអ៊ុយក្រែន លោក Vladimir Zelensky ៕
ប្រែសម្រួលៈ ណៃ តុលា
