បរទេស៖ យោងតាមការចេញផ្សាយរបស់ RT ការខាតបង់ផ្នែកហិរញ្ញវត្ថុដែលទ្រទ្រង់ដោយក្រុមហ៊ុនស្រាបៀរចម្រុះជាតិសាសន៍ Carlsberg Group ដោយសារតែការចាកចេញរបស់ខ្លួនពីប្រទេសរុស្ស៊ីមានចំនួន ៤០,៨ ពាន់លានក្រូនដាណឺម៉ាកឬត្រូវជា៥,៩ ពាន់លានដុល្លារ នេះបើយោងតាមរបាយការណ៍ប្រាក់ចំណូលពេញឆ្នាំ២០២៣របស់ក្រុមហ៊ុនដែលបានចេញផ្សាយកាលពីថ្ងៃពុធ។
កាលពីឆ្នាំមុន អាជ្ញាធររុស្ស៊ីបានគ្រប់គ្រងបណ្ដោះអាសន្នលើទ្រព្យសម្បត្តិក្នុងស្រុករបស់ក្រុមហ៊ុនដែលមានមូលដ្ឋាននៅទីក្រុង Copenhagen ដែលធ្លាប់ដំណើរការក្រុមហ៊ុន Baltika Breweries។ ការផ្លាស់ប្តូរនេះបានប៉ះពាល់ដល់ភាគហ៊ុនជាង៩៩ភាគរយនៅក្នុងដើមទុនចុះបញ្ជីរបស់ក្រុមហ៊ុន Baltika Breweries ។
មុននោះ Carlsberg ដែលជួលមនុស្សជិត៨៤០០នាក់នៅក្នុងប្រទេសរុស្ស៊ីបានស្វែងរកការលក់អាជីវកម្មនេះចំពេលមានសម្ពាធអន្តរជាតិយ៉ាងខ្លាំងលើម៉ាកយីហោអ្នកប្រើប្រាស់ឱ្យចាកចេញពីប្រទេសរុស្ស៊ីនៅក្នុងការផ្ទុះឡើងនៃប្រតិបត្តិការយោធារបស់ទីក្រុងម៉ូស្គូនៅអ៊ុយក្រែន។
ប្រតិបត្តិការក្នុងស្រុករបស់ក្រុមហ៊ុនត្រូវបានប្រគល់ទៅឱ្យទីភ្នាក់ងារគ្រប់គ្រងទ្រព្យសម្បត្តិសហព័ន្ធរុស្ស៊ី Rosimushchestvo ។ នាយកប្រតិបត្តិក្រុមហ៊ុន Carlsberg លោក Jakob Orup-Andersen ក្រោយមកបានកំណត់លក្ខណៈនៃការផ្លាស់ប្តូរនេះថាជា ការលួចអាជីវកម្មរបស់ក្រុមហ៊ុននៅក្នុងប្រទេសរុស្ស៊ី៕ ប្រែសម្រួល៖ស៊ុនលី
