ដាម៉ាស់៖ ការវាយប្រហារដោយមីស៊ីល របស់អ៊ីស្រាអែល បានកំណត់គោលដៅ នៅភាគខាងលិច នៃរដ្ឋធានីដាម៉ាស់ របស់ប្រទេសស៊ីរី បន្ទាប់ពីពាក់កណ្តាលអធ្រាត្រ សាក្សី និងប្រព័ន្ធផ្សព្វផ្សាយក្នុងស្រុកបានឲ្យដឹងនៅថ្ងៃសៅរ៍នេះ។
ការផ្ទុះខ្លាំងត្រូវបានឮ នៅតំបន់ជនបទភាគខាងលិច នៃក្រុងដាម៉ាស់ ដោយសារព័ត៌មាន ដែលគាំទ្ររដ្ឋាភិបាល al-Watan បានចុះផ្សាយថាវាជាការវាយប្រហាររបស់អ៊ីស្រាអែល។
យោងតាមសាក្សី និងប្រព័ន្ធផ្សព្វផ្សាយ គាំទ្ររដ្ឋាភិបាលបានឱ្យដឹងថា ការផ្ទុះត្រូវបានគេ ឮនៅជាយក្រុងនៃតំបន់ឌីម៉ាស់ ភាគខាងលិចទីក្រុងដាម៉ាស់ ក៏ដូចជានៅក្នុងសង្កាត់ Mashrou ‘Dummar ។
ជាមួយគ្នានេះ ក្រុមឃ្លាំមើលសិទ្ធិមនុស្សស៊ីរី បានឲ្យដឹងថា ការផ្ទុះនេះគឺជាលទ្ធផលនៃការវាយប្រហារដោយមីស៊ីលរបស់អ៊ីស្រាអែល ទៅលើគោលដៅយោធា នៅក្នុងតំបន់ឌីម៉ាស់ ដែលនៅជិតព្រំដែនស៊ីរី-លីបង់។
ក្រសួងការពារជាតិស៊ីរី បានឲ្យដឹងថា ការវាយប្រហារនេះត្រូវបានធ្វើឡើងពីពីលើតំបន់ Golan Heights កាន់កាប់ដោយអ៊ីស្រាអែល ដោយកត់សម្គាល់ថា ប្រព័ន្ធការពារដែនអាកាសបានស្ទាក់ចាប់កាំជ្រួចមួយចំនួន។
ការវាយប្រហារនេះ បានបន្សល់ទុកនូវការខូចខាត សម្ភារៈមួយចំនួន៕
ប្រែសម្រួល ឈូក បូរ៉ា
