បរទេស ៖ ឧត្តមសេនីយ៍ Carsten Breuer របស់កងទ័ពអាល្លឺម៉ង់ Bundeswehr បានអះអាងថា ប្រទេសអាល្លឺម៉ង់គួរតែបង្កើនកម្លាំងយោធារបស់ខ្លួន ដើម្បីត្រៀម សម្រាប់ជម្លោះដែលអាចកើតមានជាមួយរុស្ស៊ី ក្នុងរយៈពេល៥ឆ្នាំ ។ លោកបានអំពាវនាវឱ្យមាន “ការផ្លាស់ប្តូរចិត្តគំនិត” នៅក្នុងសង្គមអាល្លឺម៉ង់ ដោយទទូចថា ប្រទេសជាតិចាំបាច់ត្រូវបង្កើត ការទប់ស្កាត់ដែលអាចទុកចិត្តបាន។
![](https://dap-news.com/wp-content/uploads/2024/02/photo_2024-02-12_13-22-29-1024x680.jpg)
យោងតាមសារព័ត៌មាន RT ចេញផ្សាយនៅថ្ងៃទី១១ ខែកុម្ភៈ ឆ្នាំ២០២៤ បានឱ្យដឹងថា នៅក្នុងបទសម្ភាសន៍ជាមួយ កាសែតអាល្លឺម៉ង់ Welt am Sonntag ដែលបានចេញផ្សាយកាលពីថ្ងៃអាទិត្យ លោក Breuer បានព្រមានថា ប្រទេសអាល្លឺម៉ង់មិនមាន “ពេលវេលាដែលគ្មានទីបញ្ចប់” ដើម្បីក្លាយជាអ្នកមានសង្គ្រាម ដោយអះអាងថា លទ្ធភាព នៃការប្រឈមមុខដាក់គ្នា ខាងយោធាជាមួយទីក្រុងម៉ូស្គូ គឺខ្ពស់បំផុតចាប់តាំង ពីចុងបញ្ចប់នៃសង្គ្រាមត្រជាក់។
លោកបានព្យាករណ៍ថា “ប្រសិនបើខ្ញុំធ្វើតាមអ្នកវិភាគ ហើយឃើញសក្តានុពលគំរាមកំហែងផ្នែកយោធាមកពីប្រទេសរុស្ស៊ី នោះមានន័យថា ពេលវេលារៀបចំគឺពី ៥ឆ្នាំ ទៅ៨ឆ្នាំសម្រាប់ពួកយើង” ។
លោក Breuer ដែលបម្រើការជាអគ្គអធិការកិច្ចរបស់កងទ័ព Bundeswehr បានអះអាងថា “នេះមិនមានន័យថា នឹងមានសង្រ្គាមនៅពេលនោះទេ ប៉ុន្តែវាអាចទៅរួច”។
ឧត្តមសេនីយ Carsten Breuer ក៏មិនបានច្រានចោលការបញ្ចូលឡើងវិញនូវទម្រង់នៃការបម្រើយោធាជាកាតព្វកិច្ចនៅក្នុងប្រទេសអាល្លឺម៉ង់ ផងដែរ។ លោកបានកត់សម្គាល់ថា បញ្ហានៅតែត្រូវ បានពិភាក្សា ប៉ុន្តែបានលើកឡើងពី “គំរូស៊ុយអែត” ដែលគិតគូរពីការ បណ្តុះបណ្តាលយោធា ជាកាតព្វកិច្ចសម្រាប់ពលរដ្ឋភាគច្រើន ដែលបន្ទាប់មកក្លាយជាអ្នកបម្រុង។
ការអត្ថាធិប្បាយរបស់លោក Breuer ដែលជាឧត្តមសេនីយ៍ជាន់ខ្ពស់អាល្លឺម៉ង់នេះ បានកើតឡើងបន្ទាប់ពីរដ្ឋមន្ត្រីការពារជាតិអាល្លឺម៉ង់លោក Boris Pistorius បាននិយាយកាលពីខែវិច្ឆិកាថា ប្រទេសអាល្លឺម៉ង់ត្រូវតែក្លាយជា ប្រទេស “មានសមត្ថភាពធ្វើសង្គ្រាម” ។ លោកបានទទូចម្តងទៀតក្នុងខែមករាថា ទីក្រុងប៊ែរឡាំង និងអង្គការណាតូទាំងមូល គួរតែបំពាក់អាវុធដោយសកម្មជាងមុន ដើម្បីអាច “ធ្វើសង្រ្គាមដែលបង្ខំយើង”៕
ប្រែសម្រួលៈ ណៃ តុលា
![](https://dap-news.com/wp-content/uploads/2020/08/1-1.png)