បរទេស៖ ឧបនាយករដ្ឋមន្ត្រីរុស្ស៊ី លោក Denis Manturov បានបង្ហើបឱ្យដឹងថា មានតែក្រុមហ៊ុនធំៗ ប្រហែល ២០ភាគរយប៉ុណ្ណោះមកពីអឺរ៉ុប និង ១៦ភាគរយ មកពីសហរដ្ឋអាមេរិក បានចាកចេញ ពីប្រទេសរុស្ស៊ី ក្រោមសម្ពាធ នៃទណ្ឌកម្ម របស់លោកខាងលិច។
យោងតាមសារព័ត៌មាន RT ចេញផ្សាយ នៅថ្ងៃទី១៤ ខែកុម្ភៈ ឆ្នាំ២០២៤ បានឱ្យដឹងថា សហគ្រាសជាច្រើន ដែលនៅសេសសល់ ក្នុងប្រទេសរុស្ស៊ី បានបន្តបង្កើនការវិនិយោគ ។ នេះបើតាមលោក Manturov ដែលមានតួនាទី ជារដ្ឋមន្ត្រីពាណិជ្ជកម្ម និងឧស្សាហកម្មផងដែរ។
ឧបនាយករដ្ឋមន្ត្រីក៏បានគូសបញ្ជាក់ផងដែរថា ក្រុមហ៊ុនអាមេរិកធំៗចំនួន ៦៦ ក្នុងចំណោមក្រុមហ៊ុនចំនួន ៣៥០ (ប្រហែល ១៩ភាគរយ) បានចាកចេញ ។ “នេះបង្ហាញថាទីផ្សារ និងសក្តានុពលរបស់យើងមានការចាប់អារម្មណ៍ ជាពិសេសការគិតគូរពីតម្លៃ ធនធានថាមពល។ អ្នកឃើញនូវអ្វី ដែលកំពុងកើតឡើងនៅអឺរ៉ុប ដែលសហគ្រាសកំពុងធ្លាក់ចុះជាបណ្តើរៗ” ។
យោងតាមលោក Manturov, រដ្ឋាភិបាលរុស្ស៊ី នឹងបន្តទាក់ទាញការ វិនិយោគបរទេស ហើយនឹងបង្កើត លក្ខខណ្ឌចាំបាច់សម្រាប់ អ្នកឯកទេសបរទេស ក៏ដូចជាវិនិយោគិន និងម្ចាស់អាជីវកម្ម ។ “គោលនយោបាយនេះ គឺអនុវត្តចំពោះទាំងប្រទេសជាមិត្ត និង ប្រទេសដែល មិនរាក់ទាក់ផងដែរ។ យើងតែងតែបើកចំហ ចំពោះការសន្ទនាសមហេតុផល និងអ្នកវិនិយោគ ៕
ប្រែសម្រួលៈ ណៃ តុលា
