បរទេស៖ ប្រទេសរុស្ស៊ី បានផ្គត់ផ្គង់ គិតជាប្រាក់ជាង ២៩ ពាន់លានអឺរ៉ូ (៣១,២ ពាន់លានដុល្លារ) នៃថាមពលដល់សហភាពអឺរ៉ុប កាលពីឆ្នាំមុន នេះបើយោងតាមទិន្នន័យពីការិយាល័យស្ថិតិរបស់ប្លុក Eurostat ដែលត្រូវបានដកស្រង់ដោយសារព័ត៌មាន រុស្ស៊ីប្រចាំថ្ងៃ RBK ។
យោងតាមសារព័ត៌មាន RT ចេញផ្សាយនៅថ្ងៃទី១៦ ខែកុម្ភៈ ឆ្នាំ២០២៤ បានឱ្យដឹងថា តួលេខនេះ តំណាងឱ្យការធ្លាក់ចុះបីដងធៀបនឹងឆ្នាំមុន នៅពេលដែលសហភាពអឺរ៉ុប បានទិញថាមពលរុស្ស៊ី ដែលមានតម្លៃដល់ទៅជាង ៩០ ពាន់លានអឺរ៉ូ។
ប្លុកនេះបន្តនាំចូលប្រេង ផលិតផលប្រេង និងឧស្ម័នធម្មជាតិរបស់រុស្ស៊ី ទោះបីជាទីក្រុងព្រុចសែល បានហាមឃាត់ការទិញប្រេង និងផលិតផលប្រេង ពីប្រទេសរុស្ស៊ី ក៏ដោយ ការលើកលែងបណ្តោះអាសន្ន ត្រូវបានផ្តល់ជូន សម្រាប់ការនាំចូលប្រេងពីសមុទ្ររុស្ស៊ី ដោយប្រទេសប៊ុលហ្គារី និងសម្រាប់ការប្រើប្រាស់បំពង់បង្ហូរប្រេង Druzhba ដែលផ្គត់ផ្គង់ប្រទេសហុងគ្រី ស្លូវ៉ាគី និងសាធារណរដ្ឋឆេក។
ទន្ទឹមនឹងនេះ បំពង់បង្ហូរឧស្ម័ន របស់រុស្ស៊ី និង LNG មិនរងផលប៉ះពាល់ ដោយការរឹតបន្តឹងនោះទេ។
ការនាំចេញសរុបរបស់រុស្ស៊ី ទៅកាន់ប្លុក ដែលមានសមាជិក ២៧ មានចំនួន ៥០,៦៤ ពាន់លានអឺរ៉ូកាលពីឆ្នាំមុន ខណៈដែលរុស្ស៊ីបាននាំចូល ៣៨,៣២ ពាន់លានអឺរ៉ូពី EU, នេះបើយោងតាមតួលេខ ដែលមើលឃើញដោយ RBK ។
ចាប់តាំងពីខែកុម្ភៈឆ្នាំ ២០២២ នៅពេលដែលជម្លោះអ៊ុយក្រែនបានចាប់ផ្តើម ទីក្រុងព្រុចសែល (អឺរ៉ុប) បានដាក់ទណ្ឌកម្មចំនួន ១២លើក លើប្រទេសរុស្ស៊ី ដែលបានបង្រួមវិសាលភាពពាណិជ្ជកម្មបន្តិចម្តងៗ។
គណៈកម្មការអឺរ៉ុបអះអាងថា ការរឹតបន្តឹងនេះបានកាត់បន្ថយយ៉ាងមានប្រសិទ្ធភាព ប្រមាណ ១៤៧ ពាន់លានអឺរ៉ូ នៃទំហំពាណិជ្ជកម្ម “មុនការដាក់ទណ្ឌកម្ម” របស់ប្លុកជាមួយរុស្ស៊ី៕
ប្រែសម្រួលៈ ណៃ តុលា
