បរទេស៖ រដ្ឋមន្ត្រីការបរទេសចិន លោក Wang Yi បានជំរុញឱ្យរដ្ឋមន្ត្រីការបរទេស អាមេរិក លោក Antony Blinken ដកទណ្ឌកម្ម ដែលដាក់លើអាជីវកម្ម របស់ប្រទេសចិន នៅពេលដែលអ្នកទាំងពីរបានជួបគ្នានៅខាងក្រៅសន្និសីទសន្តិសុខទីក្រុង Munich លើកទី ៦០ កាលពីថ្ងៃសុក្រ។
យោងតាមសារព័ត៌មាន RT ចេញផ្សាយ នៅថ្ងៃទី១៧ ខែកុម្ភៈ ឆ្នាំ២០២៤ បានឱ្យដឹងថា ជំនួបនេះគឺជាជំនួប ចុងក្រោយបង្អស់ នៅក្នុងកិច្ចចរចា កម្រិតខ្ពស់បំផុតចាប់ តាំងពីប្រធានាធិបតីអាមេរិក Joe Biden និងប្រធានាធិបតីចិន Xi Jinping បានជួបគ្នាកាលពីខែវិច្ឆិកាឆ្នាំមុន ។ មិនយូរប៉ុន្មានបន្ទាប់ពីកិច្ចប្រជុំកំពូល របស់ពួកគេ មេដឹកនាំអាមេរិកបានធ្វើឱ្យមានការខឹងសម្បារនៅក្នុងប្រទេសចិន នៅពេល ដែលលោកបានថ្លែងថា លោកឈរដោយការអត្ថាធិប្បាយពីមុនដែលដាក់ឈ្មោះសមភាគីចិនថាជា “ជនផ្តាច់ការ” ក្នុងការឆ្លើយតបទៅនឹងសំណួរ របស់អ្នកកាសែត។
ប្រទេសទាំងពីរបាន បញ្ចប់ឆ្នាំ ២០២៣ ជាមួយនឹង ភាពតានតឹង បន្ទាប់ពីមួយឆ្នាំ ដែលនាំមកនូវការភ័យស្លន់ស្លោ របស់អាមេរិកជុំវិញ ការចោទប្រកាន់ពីប៉េងប៉ោងចារកម្មរបស់ចិន និងទណ្ឌកម្មបច្ចេកវិទ្យា របស់សហរដ្ឋអាមេរិកដែលដាក់កម្រិតលើការ ចូលប្រើប្រាស់របស់ប្រទេសចិន ចំពោះឧបករណ៍ផលិតបន្ទះឈីបកម្រិតខ្ពស់ និងឧបករណ៍ដំណើរ ការបញ្ញាសិប្បនិម្មិត។ ប្រទេសទាំងពីរក៏ត្រូវបានជាប់គាំង នៅក្នុងការប្រជែងគ្នាផ្នែកយោធា ដែលកំពុងកើនឡើង ។
លោក Wang បាននិយាយថា ការបន្តគោលបំណងនៃ “ការផ្តាច់ខ្លួនពីប្រទេសចិន” នៅទីបំផុតនឹងមានប្រតិកម្មតបទៅនឹងសហរដ្ឋអាមេរិក ដូចដែលបានលើកឡើងដោយសេវាសារព័ត៌មានរបស់ក្រសួងការបរទេសចិន។ លោកបានអំពាវនាវ ឱ្យទីក្រុងវ៉ាស៊ីនតោន ដក “ទណ្ឌកម្មដោយឯកតោភាគីខុសច្បាប់” ប្រឆាំងនឹងក្រុមហ៊ុន និងបុគ្គលរបស់ចិន ហើយកុំធ្វើឱ្យប៉ះពាល់ដល់សិទ្ធិស្របច្បាប់ ក្នុងការអភិវឌ្ឍន៍របស់ប្រទេសចិន៕
ប្រែសម្រួលៈ ណៃ តុលា
