ចិន អំពាវនាវឲ្យអាល្លឺម៉ង់ ជួយគ្នាទៅវិញទៅមក លើបញ្ហាផលប្រយោជន៍ ស្នូលរៀងៗខ្លួន

ប៉េកាំង៖ រដ្ឋមន្ត្រីការបរទេសចិន លោក វ៉ាង យី បានឲ្យដឹងថា ប្រទេសចិន ត្រៀមខ្លួនជាស្រេចក្នុងការធ្វើការ ជាមួយប្រទេសអាល្លឺម៉ង់ ដើម្បីរក្សាភាពមិនច្បាស់លាស់នៃការរំខាន បង្កើតការឯកភាពគ្នា បន្ថែមទៀត និងគាំទ្រគ្នាទៅវិញទៅមក លើបញ្ហាទាក់ទង នឹងផលប្រយោជន៍ ស្នូលរៀងៗខ្លួន ។

លោក វ៉ាង យី ដែលជាសមាជិក នៃការិយាល័យនយោបាយ នៃគណៈកម្មាធិការមជ្ឈិមបក្ស កុម្មុយនិស្តចិន បានធ្វើការកត់សម្គាល់ កាលពីថ្ងៃសៅរ៍នៅ ក្នុងកិច្ចប្រជុំ ជាមួយរដ្ឋមន្ត្រីការបរទេសអាល្លឺម៉ង់ Annalena Baerbock នៅខាងក្រៅសន្និសីទសន្តិសុខទីក្រុងម៊ុយនិក។

លោកបានលើកឡើងថា មិន មានជម្លោះផលប្រយោជន៍ ជាមូលដ្ឋានរវាងចិន និង អាល្លឺម៉ង់ទេ ហើយផលប្រយោជន៍រួមរបស់ពួកគេកំពុងបន្តពង្រឹង និងពង្រីក នេះបើយោងតាមការ ចុះផ្សាយរបស់ទីភ្នាក់ងារ សារព័ត៌មានចិនស៊ិនហួ ។

លោកក៏បានឲ្យដឹងផងដែរថា ប្រឈមមុខនឹងការផ្លាស់ប្តូរ និងភាពមិនប្រាកដប្រជា ក្នុងពិភពលោកបច្ចុប្បន្ន ប្រទេសចិន និងអាល្លឺម៉ង់ ដែលជាប្រទេសសំខាន់ពីរ និងជាក្បាលម៉ាស៊ីនដ៏សំខាន់ នៃកំណើនសេដ្ឋកិច្ចពិភពលោក គួរតែរក្សាការផ្លាស់ប្តូរ និងបង្កើនការយល់ដឹង និងការជឿទុកចិត្តគ្នាទៅវិញទៅមក ដើម្បីជំរុញទំនាក់ទំនងចិន-អាល្លឺម៉ង់ តាមបណ្តោយមាគ៌ាត្រឹមត្រូវ រួមចំណែកដល់សន្តិភាព ស្ថិរភាព ការអភិវឌ្ឍន៍ និងវិបុលភាព ។

លោកបានបន្ថែមថា នេះមិនត្រឹមតែបម្រើផល ប្រយោជន៍នៃប្រទេសទាំងពីរប៉ុណ្ណោះទេ ប៉ុន្តែថែមទាំងនាំមកនូវផល ប្រយោជន៍ដល់ប្រទេសចិន អឺរ៉ុប និងពិភពលោកទាំងមូលផងដែរ ។

លោកបានបន្ដថា ក្នុងរយៈពេលមួយឆ្នាំ កន្លងមក ការផ្លាស់ប្តូរទ្វេភាគីនៅគ្រប់កម្រិតត្រូវ បានស្តារឡើងវិញយ៉ាងពេញលេញ ហើយយន្តការសហប្រតិបត្តិការ ត្រូវបានដំណើរការជាបណ្តើរៗ ជាពិសេសការប្រព្រឹត្តទៅប្រកប ដោយជោគជ័យ នៃការពិគ្រោះយោបល់ អន្តររដ្ឋាភិបាលថ្មីមួយ ៕
ប្រែសម្រួល ឈូក បូរ៉ា