ភ្នំពេញ៖ គិតចាប់តាំងពីថ្ងៃបង្កើតប្រទេសចិនថ្មីនាថ្ងៃទី១ ខែតុលា ឆ្នាំ១៩៤៩ ដែលមានរយៈពេល៧៥ឆ្នាំនៃដំណើរដ៏មហិមារបស់ប្រជាជនចិនក្នុងគោលនយោបាយសន្តិភាពនិយមរបស់ខ្លួន និងជាពិសេសចាប់តាំងពីការចាប់ផ្តើមនៃកំណែទម្រង់សេដ្ឋកិច្ចបើកចំហនាឆ្នាំ១៩៧៨ដែលមានរយៈពេល៤៦ឆ្នាំប្រកបដោយកិត្យានុភាពសេដ្ឋកិច្ច ប្រទេសចិនបានជួយលើកកម្ពស់សុខដុមនីយកម្មរបស់មនុស្សជាតិ និងបានជំរុញល្បឿនដល់កិច្ចអភិវឌ្ឍសកល។ សន្តិភាពដ៏រឹងមាំនៅ ក្នុងផ្ទៃប្រទេស និងការចូលរួមថែរក្សាសន្តិភាពសកល ក្នុងនាមជាតួអង្គសេដ្ឋកិច្ចធំទី២របស់ពិភពលោក ប្រទេសចិនដែលមិនត្រឹមបានបង្កើនទំហំល្បឿនសេដ្ឋកិច្ចរបស់ពិភពលោក និងទទួលបានការកោតសរសើរពីពិភពលោកនូវភាពជាជើងឯកក្នុង ការនាំប្រជាជនចិនដែលមានចំនួនច្រើនជាងគេបំផុតនៅលើសកលលោកងើបចាកផុតពីភាពក្រីក្រ ប្រទេសចិន ថែមទាំងបានជំរុញកាលានុវត្តភាពកាន់តែប្រសើរដល់ជីវភាពរបស់ប្រជាជន នៅលើពិភពលោកថែមទៀតផង។ ក្នុងន័យនេះ ប្រជាជនចិនដែលមានជីវភាពធូរធារបានក្លាយជាអ្នករួមចំណែកយ៉ាងសកម្មដល់សន្តិសុខស្បៀង និងចាយដើម្បីចែករំលែកផលដល់មនុស្សជាតិ ស្របនឹងគោលនយោបាយរបស់ក្រសួងពាណិជ្ជកម្មចិនដែលបានកំណត់ឆ្នាំ២០២៤ជា «ឆ្នាំជំរុញការប្រើប្រាស់» ហើយនឹងរៀបចំសកម្មភាពជំរុញការប្រើប្រាស់មួយចំនួនបន្ថែមទៀត។
គិតចាប់តាំងពីពេលបិទបញ្ចប់គោលនយោបាយកូវីដ រយៈពេលពេញមួយឆ្នាំ២០២៣ បណ្តាប្រទេសនានាបានរំពឹងខ្ពស់រួចទៅហើយពីការស្វាគមន៍ទេសចរជនជាតិចិនមកទស្សនា ដោយបានរៀបចំនូវគោលនយោបាយទាក់ទាញជាច្រើន ដែលក្នុងនោះរួមមានទាំងគោលនយោបាយលើកលែងទិដ្ឋាការថែមទៀតផង។ នេះជាសញ្ញាណបញ្ជាក់ដោយប្រត្យក្សថា ទេសចរចិនមានគុណតម្លៃមហាសាលក្នុងការនាំយកនូវកំណើនសេដ្ឋកិច្ច និងជីវភាពកាន់តែប្រសើរជូនដល់ម្ចាស់ស្រុកថែមទៀតផង។ យោងតាមទិន្នន័យនៃវេទិកាពាក់ព័ន្ធបានបង្ហាញឱ្យឃើញថា ក្នុងវិស្សមកាលបុណ្យចូលឆ្នាំចិនឆ្នាំនេះ ទេសចរជនជាតិចិនបានចេញទៅដើរលេងនៅទីក្រុងចំនួនជាង១៧០០នៅលើពិភពលោកទាំងមូល ដោយជាក់ស្តែងការបញ្ជាទិញសំបុត្រយន្តហោះទៅកាន់សិង្ហបុរីបានកើនឡើង២៩ដង សំបុត្រយន្តហោះទៅកាន់គួឡាឡាំពួរបានកើនឡើង២០ដង សំបុត្រយន្តហោះទៅកាន់ក្រុងបាងកក បានកើនឡើង១៦ដងបើប្រៀបធៀបនឹងរយៈពេលដូចគ្នានៃឆ្នាំមុន។ លើសពីនេះ ទេសចរជនជាតិចិន យ៉ាងច្រើនបានជ្រើសរើសធ្វើដំណើរតាមរថភ្លើងល្បឿនលឿនពីប្រទេសចិន ចូលប្រទេសឡាវដើម្បីធ្វើទេសចរណ៍ក្នុងអំឡុងពេលចូលឆ្នាំថ្មីចិនដែលបានធ្វើឱ្យឧស្សាហកម្មទេសចរណ៍តាមដងផ្លូវរថភ្លើងក្នុងដែនប្រទេសឡាវកាន់តែរីកចម្រើនថែមមួយកម្រិតទៀត។
គិតចាប់ពីផ្តើមទំព័រឆ្នាំ២០២៤នេះ សេដ្ឋកិច្ចរបស់ប្រទេសចិនត្រូវបានពិភពលោកយកចិត្តទុកដាក់យ៉ាងខ្លាំង ព្រោះជាជន្ទល់និងជាលំនឹងដល់សេដ្ឋកិច្ចសកលដោយនៅចុងខែមករា ឆ្នាំ២០២៤ អង្គការមូលនិធិរូបិយវត្ថុអន្តរជាតិបានដំឡើងការប៉ាន់ប្រមាណចំពោះកំណើនសេដ្ឋកិច្ចចិននៅឆ្នាំ២០២៤ ដល់ទៅ៤,៦%គឺបានកើនឡើង០,៤%។ នាពេលថ្មីៗកន្លងទៅនេះ វិទ្យាស្ថានសិក្សាស្រាវជ្រាវសេដ្ឋកិច្ចរបស់ប្រទេសអាល្លឺម៉ង បានចេញផ្សាយរបាយការណ៍អះអាងថា សហគ្រាសអាល្លឺម៉ងបាននិងកំពុងវិនិយោគទុននៅប្រទេសចិនឱ្យបានកាន់តែច្រើន ដើម្បីឆ្លើយតបនឹងហានិភ័យដែលបណ្តាលមកពីស្ថានភាពតានតឹងនៃពាណិជ្ជកម្មសកល។ សន្ទុះដ៏ខ្លាំងក្លា នៃការប្រើប្រាស់ក្នុងបុណ្យចូលឆ្នាំថ្មីចិន ព្រមនិងលក្ខណៈសម្បតិ្តសម្រាប់ទ្រទ្រង់ការអភិវឌ្ឍសេដ្ឋកិច្ចប្រកបដោយគុណភាពខ្ពស់បានកើនឡើងជាបន្តបន្ទាប់ ដូច្នេះ នៅឆ្នាំ២០២៤ សេដ្ឋកិច្ចចិនមានជំនឿចិត្តថា នឹងមានសភាពល្អប្រសើរឡើងវិញជាបន្តបន្ទាប់ ហើយបន្ដចាក់បំពេញ«ចរន្តក្តៅ»ទៅក្នុងពិភពលោក ស្របពេលដែលប្រទេសចិនជានិច្ចកាលបានប្តេជ្ញាចិត្តក្នុងការបង្កើនសេដ្ឋកិច្ចបើកចំហជាសកល ចែករំលែក កាលានុវត្តភាព និងផលប្រយោជន៍ស្របតាមគោលនយោបាយពហុភាគីនិយម ហើយតាមរយៈការបើកចំហ និងសម្រេចបាននូវ ការផ្តល់ផលប្រយោជន៍រួមនិងឈ្នះ-ឈ្នះ។ ប្រទេសចិនបានក្លាយជាគំរូក្នុងការរក្សាការប្តេជ្ញាចិត្តក្នុងការអភិវឌ្ឍពាណិជ្ជកម្មសេរី និងការវិនិយោគសេរីជាសកល លើកកម្ពស់សេរីភាវូបនីយកម្មពាណិជ្ជកម្ម និងការវិនិយោគ រួមទាំងការធ្វើទេសចរណ៍ផងដែរ ជាក់ស្តែងប្រជាជនចិនបានធ្វើទេសចរណ៍ក្នុងស្រុកមានចំនួន៤៧៤លាននាក់ ដោយបានចំណាយសរុប៦៣២៦៨៧លានយាន់ប្រាក់ចិន ពោលគឺបានកើនជាង៣៤,៣%និង៤៧,៣%ដោយឡែកពីគ្នាបើប្រៀបធៀបនឹងឆ្នាំ២០២៣កន្លងមក។
គិតចាប់ពីប្រាជ្ញាចិនស្តីពី«កិច្ចកសាងសហគមន៍ជោគវាសនារួមនៃមនុស្សជាតិ» ចេញដំណើរយ៉ាងស្វាហាប់ចាប់ពីឆ្នាំ២០១៣ដែលមានអាយុកាលជាង១ទសវត្សរ៍ដោយមានគំនិតផ្តួចផ្តើម«ខ្សែក្រវាត់និងផ្លូវ» និងគំនិតផ្តួចផ្តើមសកលចំនួន៣ថែមទៀតគាំទ្រ បានរំលេចយ៉ាងច្បាស់ពីគតិបណ្ឌិតរបស់ចិន ដូចទៅនឹងប្រសាសន៍របស់លោក Wang Yi ដែលបានលើកឡើងកាលពីថ្ងៃទី១៧ ខែកុម្ភៈ ឆ្នាំ២០២៤ថា បើទោះបីជាស្ថានការណ៍អន្តរជាតិប្រែប្រួលយ៉ាងណាក៏ដោយ ក្នុងនាមជាប្រទេសមហាអំណាចដែលមានទំនួលខុសត្រូវ ប្រទេសចិននឹងបន្តយ៉ាងរឹងមាំនៅ ក្នុងការថែរក្សានិរន្តរភាពនិងស្ថិរភាពនៃគោលនយោបាយជាប់រហូត ដើម្បីធ្វើជាកម្លាំងលំនឹងយ៉ាងមុតមាំដល់ពិភពលោក ដែលមានភាពរង្គោះរង្គើ ដោយកម្លាំងលំនឹងរបស់ប្រទេសចិនមានចំនួន៤សម្រាប់៖ ១-ជំរុញកិច្ចសហប្រតិបត្តិការរវាងប្រទេសមហាអំណាច ២-ឆ្លើយតបនឹងបញ្ហាចំណុចក្តៅ ៣-ពង្រឹងអភិបាលកិច្ចសកល និង៤-ជំរុញកំណើនសកល ដើម្បីបន្តចូលរួមចំណែកយ៉ាងសកម្មនិងសំខាន់ថែរក្សាសន្តិភាព និងបង្កើនល្បឿន នៃការពន្លត់ភ្នក់ភ្លើង នៃសង្គ្រាមហើយនាំនូវការផ្តល់កាលានុវត្តភាពជូនដល់បណ្តាប្រទេសនានា នៅលើពិភពលោកប្រកៀកស្មាអភិវឌ្ឍសេដ្ឋកិច្ចជាមួយប្រទេសចិន ស្របពេលនឹងពេលវេលា នៃការទទួលអំណរឆ្នាំថ្មី ឆ្នាំរោងឬសត្វនាគ ដែលតំណាងឱ្យមហិទ្ធិរិទ្ធ ឫទ្ធានុភាព ឧត្តមភាពខ្លាំងក្លា ផ្តល់ឋាមពលដ៏មហិមាដើម្បីមានពលំរឹងមាំចូលរួមជ្រោងទង់នៃកិច្ចកសាងសហគមន៍រួមវាសនានៃមនុស្សជាតិ និងចូលរួមពួតដៃគ្នាដែលមានចិនជាគំរូក្នុងការផ្តល់ជីវិតល្អបវរនិងវិបុលភាពជូនដល់មនុស្សជាតិទាំងមូលដោយឈរលើការអភិវឌ្ឍប្រកបដោយចីរភាពសម្រាប់ភពផែនដីរបស់យើង៕
ដោយបណ្ឌិត ជា មុនីឫទ្ធិសមាជិកគណៈប្រតិបត្តិសមាគមមិត្តភាពកម្ពុជា-ចិន
