ប៉េកាំង៖ បេសកជនចិន បានឲ្យដឹងថា បទឈប់បាញ់ជាបន្ទាន់នៅតំបន់ហ្គាហ្សា គឺជាការចាំបាច់ ហើយខ្លឹមសារនៃសកម្មភាពរបស់ក្រុមប្រឹក្សាសន្តិសុខ គឺដើម្បីសម្រេចបានបទឈប់បាញ់ភ្លាមៗ។
វេតូរបស់សហរដ្ឋអាមេរិកនៃដំណោះស្រាយដែលព្រាងដោយអាល់ហ្សេរីកាលពីថ្ងៃអង្គារមានន័យថាក្រុមប្រឹក្សាសន្តិសុខ បានខកខានឱកាសមួយផ្សេងទៀត ដើម្បីជំរុញឱ្យមានបទឈប់បាញ់នៅតំបន់ហ្គាហ្សា។
ការបន្តនៃជម្លោះសូម្បីតែមួយថ្ងៃទៀតនឹងធ្វើឱ្យជនស៊ីវិលស្លាប់និងរបួសកាន់តែច្រើន ហើយនាំឱ្យមានមហន្តរាយកាន់តែខ្លាំង។ លោក Zhang Jun តំណាងអចិន្ត្រៃយ៍របស់ប្រទេសចិន ប្រចាំនៅអង្គការសហប្រជាជាតិ បានឲ្យដឹងថា បទឈប់បាញ់ជាបន្ទាន់នៅក្នុងតំបន់ហ្គាហ្សា គឺជាការចាំបាច់ជាបន្ទាន់មួយ ដើម្បីជួយសង្គ្រោះជីវិតមនុស្សស្លូតត្រង់ និងដើម្បីការពារកុំឲ្យមានសង្រ្គាមកាន់តែធំ។
លោកបានប្រាប់ក្រុមប្រឹក្សាសន្តិសុខថា “បទឈប់បាញ់ជាបន្ទាន់ គឺជាបំណងប្រាថ្នាទូទៅ ដែលបញ្ចេញដោយសហគមន៍អន្តរជាតិ និងការយល់ស្របនៃមតិភាគច្រើនលើសលប់របស់ក្រុមប្រឹក្សាសន្តិសុខ” ។
ចិនដឹងហើយថា សហរដ្ឋអាមេរិកបានរៀបចំសេចក្តីព្រាងសេចក្តីសម្រេចរបស់ខ្លួន។ លោក Zhang បានឲ្យដឹងថា ប្រទេសចិនសង្ឃឹមថា សហរដ្ឋអាមេរិក នឹងបង្ហាញអាកប្បកិរិយាប្រកបដោយទំនួលខុសត្រូវ ឆ្លើយតបជាវិជ្ជមានចំពោះការអំពាវនាវអន្តរជាតិ និងគោរពការឯកភាពដែលបានបង្កើតឡើងក្នុងចំណោមសមាជិកក្រុមប្រឹក្សាសន្តិសុខ។
លោកបានលើកឡើង “យើងត្រូវចង្អុលបង្ហាញថាខ្លឹមសារនៃសកម្មភាពណាមួយរបស់ក្រុមប្រឹក្សានេះ គឺដើម្បីសម្រេចបាននូវបទឈប់បាញ់ភ្លាមៗ។ សារណាមួយដែលផ្ញើចេញតាមរយៈសកម្មភាពរបស់យើងត្រូវតែច្បាស់លាស់ និងមិនអាចប្រកែកបាន ជាជាងនិយាយបំផ្លើស”៕ ប្រែសម្រួល ឈូក បូរ៉ា
