ហាណូយ៖ យោងតាមការិយាល័យ ស្ថិតិទូទៅរបស់ប្រទេស (GSO) បានឱ្យដឹងថា សន្ទស្សន៍ជាតិនៃផលិតកម្មឧស្សាហកម្ម របស់ប្រទេសវៀតណាម ក្នុងខែកុម្ភៈ បានធ្លាក់ចុះ ១៨ភាគរយធៀបនឹងខែមករា និង ៦,៨ភាគរយពីមួយឆ្នាំទៅមួយឆ្នាំ។
GSO បានឲ្យដឹងថាក្នុងរយៈពេលពីរខែដំបូង នៃឆ្នាំ២០២៤ សន្ទស្សន៍បានកើនឡើង ៥,៧ភាគរយពីមួយឆ្នាំទៅមួយឆ្នាំ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
វិស័យរ៉ែបានរាយការណ៍ ពីការធ្លាក់ចុះពីមួយឆ្នាំទៅមួយឆ្នាំនៃ ៣,៥ភាគរយ ក្នុងអំឡុងពេលដែលបានលើកឡើង ខណៈពេលដែលវិស័យកែច្នៃ និងផលិតកម្មកើនឡើង ៥,៩ភាគរយ។
វិស័យផលិត និងចែកចាយអគ្គិសនីបានកើនឡើង ១២,២ ភាគរយ ហើយវិស័យផ្គត់ផ្គង់ទឹក និងការគ្រប់គ្រងសំណល់កើនឡើង ២,៥ ភាគរយ។ GSO បានឲ្យដឹងទៀតថា សន្ទស្សន៍ផលិតកម្មឧស្សាហកម្ម ក្នុងរយៈពេលពីរខែបានកើនឡើងនៅក្នុងទីតាំង ៥៦ ក្នុងស្រុកទូទាំងប្រទេសហើយ បានធ្លាក់ចុះនៅក្នុងទីតាំង ៧ ផ្សេងទៀត។
តំបន់ខ្លះមានសន្ទស្សន៍ ផលិតកម្មឧស្សាហកម្មខ្ពស់ ដោយសារនិន្នាការ កើនឡើងក្នុងវិស័យកែច្នៃ ផលិតកម្ម និងការផលិត និងចែកចាយអគ្គិសនី ៕
ប្រែសម្រួល ឈូក បូរ៉ា
