យេរ៉ូសាឡឹម៖ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានប្រកាសថា យោធាអ៊ីស្រាអែល កំពុងរៀបចំបើកការវាយប្រហារលើទីក្រុងរ៉ាហ្វា ខណៈដែលការចរចាបទឈប់បាញ់ បានចាប់ផ្តើមឡើងវិញនៅក្នុងប្រទេសអេហ្ស៊ីប។
ទីក្រុងរ៉ាហ្វា ដែលជាទីក្រុងភាគខាងត្បូងបំផុត របស់តំបន់ហ្គាហ្សា បានក្លាយជាជម្រក សម្រាប់ជនភៀសខ្លួនប៉ាឡេស្ទីន ជាងមួយលាននាក់ ដែលកំពុងស្វែងរកទីជំរកពីការទម្លាក់គ្រាប់បែក។ អ្នកជំនាញរបស់អង្គការសហប្រជាជាតិ និងប្រទេសមួយចំនួនបានព្រមានថា ប្រតិបត្តិការជើងគោកណាមួយនៅក្នុងទីក្រុងនេះ នឹងនាំឱ្យមានមហន្តរាយដល់ជនស៊ីវិល។
នៅក្នុងសន្និសីទសារព័ត៌មានមួយ លោក ណេតាន់យ៉ាហ៊ូ បានឲ្យដឹងថា បន្ទាប់ពីការយល់ព្រមរបស់គាត់ចំពោះ ផែនការរបស់យោធាសម្រាប់ការ វាយប្រហារលើដីនៅទីក្រុងរ៉ាហ្វា កាលពីដើមខែមីនា ឥឡូវនេះកងទ័ពកំពុងរៀបចំ ជម្លៀសប្រជាជនមុនពេលវាយប្រហារទីក្រុង។
លោកបានបន្តថា “វានឹងត្រូវការពេលវេលា ប៉ុន្តែវានឹងត្រូវបានធ្វើ យើងនឹងចូលទៅក្នុងទីក្រុងរ៉ាហ្វា ហើយសម្លាប់កងវរសេនាតូចរបស់ក្រុមហាម៉ាស នៅទីនោះ។ គ្មានជ័យជំនះនោះទេ ប្រសិនបើមិនបានចូលទៅក្នុងទីក្រុងរ៉ាហ្វា និងកម្ចាត់កងវរសេនាតូចរបស់ក្រុមហាម៉ាស នៅទីនោះ” ៕
ប្រែសម្រួល ឈូក បូរ៉ា
Recommended for you
