បរទេស៖យោងតាមការចេញផ្សាយរបស់ RT អភិបាលក្នុងតំបន់បាននិយាយថា យ៉ាងហោចណាស់មនុស្សប្រាំបួននាក់បានរងរបួសកាលពីថ្ងៃចន្ទដោយការវាយប្រហារ ចុងក្រោយបង្អស់របស់អ៊ុយក្រែនទៅលើតំបន់ព្រំដែន Belgorod របស់ប្រទេសរុស្ស៊ីដែលក្នុងនោះ គោលដៅពីលើអាកាសជាង ៣៦ ត្រូវបានស្ទាក់ចាប់ដោយកងកម្លាំង
រុស្ស៊ី។
អភិបាលខេត្ត Vyacheslav Gladkov បានសរសេរក្នុងសារ Telegram ថា បុរសម្នាក់បានទទួលរបួសទ្រូងយ៉ាងធ្ងន់ធ្ងរ ខណៈដែលកូនស្រីរបស់គាត់ត្រូវរង គ្រោះហើយទោះបីជាយ់ាងណាក្តី អ្នករបួសទាំងអស់ត្រូវបានបញ្ជូនទៅសង្គ្រោះនៅមន្ទីរពេទ្យបានរួចរាល់ហើយ។
ការវាយប្រហារនេះបានបំផ្លាញផ្ទះជាច្រើនខ្នង ដោយបង្អួចបានបែកខ្ទេចខ្ទីនៅក្នុងអគារខ្ពស់ចំនួនប្រាំបីនៅក្នុងទីក្រុង Belgorod ជាមួយនឹងផ្ទះតូចៗចំនួន៣ ខ្នង ក៏រងការខូចខាតផងដែរ។
អភិបាលខេត្តបាននិយាយថា សាលារៀនក្នុងតំបន់មួយនិងរថយន្តបីគ្រឿង ដែលមួយត្រូវបានឆេះទាំងស្រុងបានរងការខូចខាតដោយការវាយប្រហារហើយបើ យោងតាមលោក Gladkov ផ្ទះជាច្រើននៅខាងក្រៅទីក្រុងក៏ត្រូវការការជួសជុលឡើងវិញផងដែរ៕
ប្រែសម្រួល៖ស៊ុនលី
