តូក្យូ៖ នាយករដ្ឋមន្ត្រីជប៉ុនលោក ហ្វូមីអូ គីស៊ីដា និងប្រធានាធិបតីអាមេរិក លោក ចូ បៃដិន បានព្រមព្រៀងគ្នា ដើម្បីពង្រឹងសម្ព័ន្ធភាពសន្តិសុខ របស់ពួកគេជាមួយនឹងការអះអាងផ្នែកយោធា ដែលកំពុងកើនឡើងរបស់ចិន នៅក្នុងតំបន់ឥណ្ឌូប៉ាស៊ីហ្វិកក្នុងចិត្ត ខណៈពេលដែលប្តេជ្ញាថា នឹងក្លាយជា “ដៃគូសកល” នៅពេលដែលទំនាក់ទំនង របស់ពួកគេមានការវិវត្តកាន់តែល្អ។
នៅក្នុងកិច្ចប្រជុំកំពូលរយៈពេល ៨៥នាទី របស់ពួកគេដែលបានធ្វើឡើងក្នុងអំឡុង ពេលដំណើរទស្សនកិច្ចផ្លូវរដ្ឋរបស់លោក គីស៊ីដា ទៅកាន់សហរដ្ឋអាមេរិក ដែលជាលើកទីមួយ ដោយនាយករដ្ឋមន្ត្រីជប៉ុន ក្នុងរយៈពេល ៩ឆ្នាំ មេដឹកនាំទាំងពីរក៏បានបញ្ជាក់ផងដែរថា ពួកគេនឹងរួមដៃគ្នាក្នុងការជំរុញទំនាក់ទំនង រវាងកងកម្លាំងរបស់ពួកគេ និងការពង្រឹងខ្សែសង្វាក់ផ្គត់ផ្គង់ សម្រាប់ផលិតផលសំខាន់ៗដូចជា semiconductors ដើម្បីដោះស្រាយភាពខ្លាំងក្លា ក្នុងតំបន់របស់ប្រទេសចិន ។
បន្ទាប់ពីប្រទេសជប៉ុន និងសហរដ្ឋអាមេរិកបានគូសវាសកិច្ចព្រមព្រៀងចំនួន ៧០ រួមទាំងបញ្ហាការពារជាតិ និងសេដ្ឋកិច្ច លោក បៃដិន បាននិយាយនៅក្នុងសន្និសីទ សារព័ត៌មានរួមគ្នាជាមួយលោក គីស៊ីដា ថា “យើងឈរស្មាស្មាជាមួយសម្ព័ន្ធមិត្តម្តងទៀត ពីព្រោះសម្ព័ន្ធភាពរបស់យើង គឺជាទ្រព្យសម្បត្តិដ៏អស្ចារ្យបំផុតរបស់អាមេរិក “។
លោកបន្ដថា “យើងកំពុងធ្វើទំនើបកម្មរចនាសម្ព័ន្ធបញ្ជា និងត្រួតពិនិត្យ ហើយយើងកំពុងបង្កើនអន្តរប្រតិបត្តិការ និងការធ្វើផែនការនៃកងយោធារបស់យើង ដូច្នេះយើងអាចធ្វើការជាមួយគ្នា បានយ៉ាងរលូន និងមានប្រសិទ្ធភាព។ នេះគឺជាការធ្វើឱ្យប្រសើរឡើង ដ៏សំខាន់បំផុតនៅក្នុងសម្ព័ន្ធភាព របស់យើងចាប់តាំងពីវាត្រូវបានបង្កើតឡើងដំបូង៕
ប្រែសម្រួល ឈូក បូរ៉ា
