ម៉ូស្គូ៖ អ្នកនាំពាក្យវិមានក្រឹមឡាំង លោក Dmitry Peskov បានឲ្យដឹងថា ប្រទេសរុស្ស៊ី នឹងសងសឹកវិញ ប្រសិនបើទ្រព្យសម្បត្តិ ដែលជាប់គាំងរបស់ខ្លួន ត្រូវបានរឹបអូសនោះ។
សភាតំណាងរាស្រ្តសហរដ្ឋអាមេរិក កាលពីថ្ងៃសៅរ៍បានអនុម័តច្បាប់ជំនួយបរទេសជាបន្តបន្ទាប់ រួមទាំងវិធានការរឹបអូសទ្រព្យសម្បត្តិរុស្ស៊ីដែលបង្កក ដើម្បីផ្តល់មូលនិធិដល់អ៊ុយក្រែន។
លោក Peskov បានលើកឡើងថា “នេះគឺជាការទន្ទ្រានយកទ្រព្យសម្បត្តិរដ្ឋ” ។ លោកបានបន្ថែមថា វាជារឿងខុសច្បាប់ ហើយនឹងត្រូវរងនូវ “សកម្មភាពសងសឹកមួយចំនួន” ឬវិវាទ។
លោកបានបន្ដថា “ប្រសិនបើវិធានការបែបនេះត្រូវបានអនុវត្ត ប្រទេស និងអ្នកវិនិយោគជាច្រើននឹងគិត ១០ដងមុនពេលវិនិយោគនៅក្នុងសេដ្ឋកិច្ចអាមេរិក ឬរក្សាទុកទ្រព្យសម្បត្តិរបស់ពួកគេនៅទីនោះ” ដោយកត់សម្គាល់ថា ការផ្លាស់ប្តូរនេះនឹងធ្វើឱ្យប៉ះពាល់ដល់ផលប្រយោជន៍សេដ្ឋកិច្ចរបស់សហរដ្ឋអាមេរិក៕ប្រែសម្រួល ឈូក បូរ៉ា
