បរទេស៖ យោងតាមការចេញផ្សាយរបស់ RT ស្វីសកំពុងកាន់កាប់ទ្រព្យសម្បត្តិរុស្ស៊ីប្រមាណ ១៣ ពាន់លានហ្វ្រង់ ឬត្រូវជា១៤,៣ ពាន់លានដុល្លារ ដែលជាប់គាំងនៅក្នុងស្ថាប័នហិរញ្ញវត្ថុរបស់ខ្លួន ហើយក្នុងនោះប្រហែលពាក់កណ្តាលជារបស់រដ្ឋ និងពាក់កណ្តាលជាកម្មសិទ្ធិឯកជន។
ខណៈពេលដែលតម្លៃនៃទ្រព្យសម្បត្តិរដ្ឋ របស់រុស្ស៊ីនៅតែមិនផ្លាស់ប្តូរ អាជ្ញាធរស្វីសបានរាយការណ៍ ពីការធ្លាក់ចុះយ៉ាងខ្លាំងនៃតម្លៃ នៃមូលនិធិឯកជន។
អាជ្ញាធរបាននិយាយថា គិតត្រឹមដំណាច់ខែធ្នូ មូលនិធិ និងទ្រព្យសម្បត្តិសរុបចំនួន៥,៨ពាន់លានហ្វ្រង់ ឬត្រូវជា៦,៣ ពាន់លានដុល្លារ ដែលជាកម្មសិទ្ធិរបស់បុគ្គល ឬអង្គភាពដែលទទួលទណ្ឌកម្មរបស់រុស្ស៊ីត្រូវបានបង្កកនៅក្នុងប្រទេសស្វីស។
ទោះបីជាយ៉ាងណាក្តីតួលេខនេះ តំណាងឱ្យការធ្លាក់ចុះ ១,៧ ពាន់លានហ្វ្រង់ ឬ១,៩ ពាន់លានដុល្លារពី ៧,៥ ពាន់លានហ្វ្រង់ដែលបានចុះបញ្ជីនៅចុងឆ្នាំ ២០២២នេះបើយោងតាមលេខាធិការដ្ឋាន កិច្ចការសេដ្ឋកិច្ចស្វីស (SECO) ។
អាជ្ញាធរស្វីសបាននិយាយកាលពីឆ្នាំមុនថា ពួកគេបានបង្កកទ្រព្យសម្បត្តិហិរញ្ញវត្ថុចំនួន ៥៨០លានហ្វ្រង់ ឬត្រូវជា៦៣៦លានដុល្លារ និងទ្រព្យសម្បត្តិពីរបន្ថែមទៀត បន្ទាប់ពីការស៊ើបអង្កេតផ្ទាល់ខ្លួនរបស់ពួកគេនិង ការបញ្ជាក់លម្អិត ដោយធនាគារ៕
ប្រែសម្រួល៖ ស៊ុន លី
