បរទេស៖ រដ្ឋអាជ្ញារបស់វៀតណាមបានផ្តល់អនុសាសន៍ឱ្យដាក់ពន្ធនាគារពី ៩ឆ្នាំ ទៅ ១០ ឆ្នាំ ចំពោះលោក Tran Qui Thanh ប្រធានក្រុមហ៊ុនផលិតភេសជ្ជៈឈានមុខគេ Tan Hiep Phat ដោយបានផ្តល់កត្តាកាត់បន្ថយភាពធ្ងន់ធ្ងរសម្រាប់ការចោទប្រកាន់ពីបទ “រំលោភលើទំនុកចិត្តចំពោះទ្រព្យសម្បត្តិសមស្រប” ។
យោងតាមសារព័ត៌មាន VN Express ចេញផ្សាយកាលពីថ្ងៃទី២៤ ខែមេសា ឆ្នាំ២០២៤ បានឱ្យដឹងថា លោក Thanh អាយុ ៧១ ឆ្នាំ, លោកស្រី Tran Uyen Phuong អាយុ ៤៣ ឆ្នាំ ដែលជាអគ្គនាយករងនៃក្រុមហ៊ុន Tan Hiep Phat និង លោកស្រីTran Ngoc Bich អាយុ ៤០ឆ្នាំ កំពុងត្រូវបានកាត់ទោសពីបទផ្តល់ប្រាក់កម្ចីប្រឆាំងនឹងវត្ថុបញ្ចាំហើយបន្ទាប់មកបង្ខិតបង្ខំអ្នកខ្ចីឱ្យលក់ទ្រព្យសម្បត្តិក្នុងតម្លៃថោក មានតម្លៃ ១,០៤៨ ពាន់ពាន់លានដុង ស្មើនឹងប្រហែល ៤១,២ លានដុល្លារ។
រដ្ឋអាជ្ញាបាននិយាយនៅរសៀលថ្ងៃពុធថា លោក Thanh គឺជាមេខ្លោងនៅពីក្រោយការក្លែងបន្លំនេះ ខណៈដែលកូនស្រីរបស់លោក គ្រាន់តែធ្វើតាមការណែនាំ។ រដ្ឋអាជ្ញាបាននិយាយថា៖ «ក្នុងករណីនេះ លោក Thanh ត្រូវទទួលខុសត្រូវចំពោះប្រតិបត្តិការ និងការចរចាដោយផ្ទាល់ជាមួយអ្នកខ្ចី។
រដ្ឋអាជ្ញាបានអះអាងថា នៅពេលប្រព្រឹត្តខុស អ្នកទាំងបីបានទទួលការអប់រំ និង ទទួលស្គាល់កំហុស ប៉ុន្តែបានជ្រើសរើសចូលរួមក្នុងគម្រោងផ្តល់ប្រាក់កម្ចីដល់ទ្រព្យសម្បត្តិសមស្របពីអ្នកខ្ចីក្នុងរយៈពេលយូរ។
យ៉ាងណាក៏ដោយ ពួកគេបានទទួលស្គាល់ភាពចាស់ជរារបស់លោក Thanh និងការរួមចំណែករបស់អ្នកទាំងបីចំពោះសេដ្ឋកិច្ច និងសង្គមថាជាកត្តាកាត់បន្ថយទោស៕
ប្រែសម្រួលៈ ណៃ តុលា
