បរទេស៖ បើយោងតាមរបាយការណ៍របស់ប្រព័ន្ធផ្សព្វផ្សាយរដ្ឋចិន បានឱ្យដឹងថាកងទ័ពជើងទឹកចិនកាលពីថ្ងៃពុធបានចាប់ផ្តើមការសាកល្បងនាវាផ្ទុកយន្តហោះទីបី និងទំនើបបំផុតរបស់ខ្លួន ។ ការធ្វើតេស្តនេះ គឺជាដំណាក់កាលចុងក្រោយ មុនពេលនាវាចម្បាំងត្រូវបានដាក់ឱ្យដំណើរការ។
យោងតាមសារព័ត៌មាន RT ចេញផ្សាយនៅថ្ងៃទី២ ខែឧសភា ឆ្នាំ២០២៤ បានឱ្យដឹងថា ជាមួយនឹងការផ្លាស់ទំងន់ នាវា Fujian មានទំងន់ដល់ទៅ ៨០.០០០ តោន ដែលធ្ងន់ជាងនាវាផ្ទុកយន្តហោះសកម្មពីររបស់កងទ័ពរំដោះប្រជាជនរំដោះប្រជាជន (PLAN) គឺនាវា Shandong ទំងន់ ៦៦.០០០ តោន និងនាវា Liaoning ទំងន់ ៦០.០០០ តោន ។ មានតែកងទ័ពជើងទឹកអាមេរិកប៉ុណ្ណោះដែលដំណើរការនាវាផ្ទុកយន្តហោះធំជាងនាវា Fujian។
នាវានេះមានចម្ងាយជើងហោះហើររាបស្មើពេញប្រវែងជាមួយនឹងប្រព័ន្ធបាញ់បង្ហោះ កម្រិតខ្ពស់សម្រាប់យន្តហោះ ដែលអាចឱ្យវាដំណើរការសម្រាប់យន្តហោះធំ និងធ្ងន់ជាង នាវា Shandong និង នាវា Liaoning ។
ការសាកល្បងចុងក្រោយចាប់ផ្តើមជិតពីរឆ្នាំ បន្ទាប់ពីនាវាផ្ទុកយន្តហោះដែលបានរចនា និងសាងសង់ក្នុងស្រុកទាំងស្រុង ត្រូវបានដាក់បង្ហាញជាលើកដំបូងនៅក្នុងខែមិថុនា ឆ្នាំ ២០២២ ហើយមកដល់ពេលដែលភាពតានតឹងកើនឡើងនៅក្នុងសមុទ្រចិនខាងត្បូង។
យោងតាមកងទ័ពជើងទឹកចិន បានឱ្យដឹងថា ការសាកល្បងនៅសមុទ្រមានគោលបំណងវាយតម្លៃ “ភាពជឿជាក់ និងស្ថេរភាពនៃប្រព័ន្ធជំរុញ និងថាមពលរបស់នាវាផ្ទុកយន្តហោះ”។ នាវាផ្ទុកយន្តហោះនេះត្រូវបានគេដាក់ឈ្មោះក្នុងចំណោម “ផ្នែករឹងយោធាសំខាន់បំផុត” ដែលទីក្រុងប៉េកាំងកំពុងអភិវឌ្ឍ។
ក្រុមអ្នកវិភាគនិយាយថា សមត្ថភាពរបស់នាវា Fujian ក្នុងការបាញ់បង្ហោះយន្តហោះចម្បាំងធំជាង ដែលផ្ទុកគ្រាប់រំសេវកាន់តែឆ្ងាយ នឹងផ្តល់ឱ្យនាវាអាចមានសមត្ថភាពប្រយុទ្ធធំជាងយន្តហោះជំនាន់មុនរបស់ខ្លួននៅក្នុងកងនាវាចិន ដោយផ្តល់ឱ្យកងទ័ពជើងទឹករបស់ប្រទេសនូវសមត្ថភាពផ្លូវសមុទ្រ ពោលគឺសមត្ថភាពក្នុងការធ្វើប្រតិបត្តិការនៅលើសមុទ្រខ្ពស់។
លោក Carl Schuster អតីតប្រធានក្រុមទ័ពជើងទឹកអាមេរិក និងជាអតីតប្រធានប្រតិបត្តិការនៅមជ្ឈមណ្ឌលស៊ើបការណ៍សម្ងាត់រួមរបស់បញ្ជាការអាមេរិកប៉ាស៊ីហ្វិក បានប្រាប់ CNN ថា “ការសាកល្បងសមុទ្រទាំងនេះ គឺជាជំហានដ៏សំខាន់ដំបូងក្នុងការអភិវឌ្ឍន៍របស់ប្រទេសចិន ក្នុងការបង្កើតសមត្ថភាព ក្នុងការផលិតថាមពលអាកាសតាមសមុទ្រ ទៅកាន់តំបន់មហាសមុទ្រដ៏ជ្រៅ”៕
