តូក្យូ៖ នាយករដ្ឋមន្ត្រីជប៉ុនលោក ហ្វូមីអូ គីស៊ីដា និងប្រធានាធិបតី បារាំងលោក អេម៉ានុយអែល ម៉ាក្រុង បានព្រមព្រៀងគ្នា កាលពីថ្ងៃព្រហស្បតិ៍ ដើម្បីចាប់ផ្តើមការចរចា លើកិច្ចព្រមព្រៀង ចូលដំណើរការទៅវិញទៅមក ដូច្នេះប្រទេសទាំងពីរ អាចសម្របសម្រួលកិច្ច សហប្រតិបត្តិការការពារជាតិ កាន់តែជិតស្និទ្ធ ដូចជាសមយុទ្ធរួម និងប្រតិបត្តិការសង្គ្រោះគ្រោះ មហន្តរាយជាដើម។
ប្រទេសជប៉ុនមានកិច្ចព្រមព្រៀង ចូលដំណើរការទៅវិញទៅមកជាមួយអូស្ត្រាលី និងអង់គ្លេស ដែលអនុញ្ញាតឱ្យកងកម្លាំង ការពាររបស់ពួកគេចូលទៅកាន់ទឹកដីរបស់គ្នាទៅវិញទៅមកដោយរលូនសម្រាប់គោលបំណងចម្រុះ។ បន្ថែមពីនេះ ខ្លួនបានយល់ព្រមជាមួយប្រទេសហ្វីលីពីន ក្នុងការផ្តើមការចរចា សម្រាប់កិច្ចព្រមព្រៀងបែបនេះ។
លោក គីស៊ីដា បានជួបជាមួយលោក ម៉ាក្រុង ខណៈដែលទីក្រុងតូក្យូ បាននឹងកំពុងបង្កើនកិច្ចខិតខំប្រឹងប្រែង ដើម្បីពង្រឹងទំនាក់ទំនងសន្តិសុខ ជាមួយបណ្តាប្រទេស ដែលមានគំនិតដូចគ្នានៅ ក្នុងតំបន់ឥណ្ឌូប៉ាស៊ីហ្វិក ដើម្បីដោះស្រាយកាន់តែប្រសើរឡើង ជាមួយនឹងការអះអាងយោធា ដែលកំពុងកើនឡើង របស់ចិននៅក្នុងដែនទឹកក្បែរនោះ។
យោងតាមក្រសួងការបរទេសចិនបានឱ្យដឹងថា ប្រធានាធិបតីចិនលោក ស៊ី ជីនពីង នឹងធ្វើទស្សនកិច្ចនៅប្រទេសបារាំង និងជួបជាមួយលោក ម៉ាក្រុង នៅចុងខែនេះ ។
ប្រទេសជប៉ុន និងបារាំង បានចុះហត្ថលេខា លើកិច្ចព្រមព្រៀងដាច់ដោយឡែករួចហើយ ដើម្បីពង្រីកកិច្ចសហប្រតិបត្តិការ សន្តិសុខរបស់ពួកគេ រួមទាំងកិច្ចព្រមព្រៀងទិញយក និង សេវាឆ្លងកាត់ ដែលជួយសម្រួលដល់ដំណើរ ការនៃការចែករំលែក ស្បៀងអាហារ ប្រេងឥន្ធនៈ និងគ្រាប់រំសេវរវាងកងកម្លាំងរបស់ពួកគេ ៕
ប្រែសម្រួល ឈូក បូរ៉ា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
