គៀវ៖ ក្រុមហ៊ុនថាមពលរដ្ឋរបស់អ៊ុយក្រែន Ukrenergo បានឲ្យដឹងថា ប្រទេសនេះស្ថិតក្នុងការខ្វះខាតអគ្គិសនីយ៉ាងខ្លាំង ដោយសារតែការវាយប្រហារដោយមីស៊ីល និងយន្តហោះដ្រូនរបស់រុស្ស៊ី។
ក្រុមហ៊ុន Ukrenergo បានឲ្យដឹងនៅក្នុងសារបង្ហោះនៅលើ Telegram ថា រោងចក្រថាមពលរបស់ប្រទេសអ៊ុយក្រែន មិនអាចផលិតថាមពលអគ្គិសនីបានដូចមុនពេលការវាយប្រហាររបស់រុស្ស៊ីដែលជាលទ្ធផលនៃការខូចខាតទ្រង់ទ្រាយធំនោះទេ។
ប្រទេសនេះកំពុងអនុវត្តកាលវិភាគកំណត់ថាមពល សម្រាប់អ្នកប្រើប្រាស់ឧស្សាហកម្មចាប់ពីម៉ោង ៦ ល្ងាចតទៅនៅថ្ងៃសុក្រ ដល់ម៉ោង ៧ព្រឹកថ្ងៃសៅរ៍នេះ ដើម្បីទូទាត់ការខ្វះខាតអគ្គិសនីមួយផ្នែក។ ទន្ទឹមនឹងនេះដែរ ខ្លួនក៏បាននិងកំពុងនាំចូលអគ្គិសនីក្នុងរយៈពេលពីរថ្ងៃកន្លងមកនេះពីបណ្តាប្រទេសសហភាពអឺរ៉ុប ដើម្បីគ្របដណ្តប់ឱនភាពក្នុងស្រុក។
ក្រុមហ៊ុន Ukrenergo បានឲ្យដឹងថា ប្រទេសរុស្ស៊ីបានធ្វើការវាយប្រហារធំៗចំនួនប្រាំរួចមកហើយលើប្រព័ន្ធថាមពលរបស់អ៊ុយក្រែនក្នុងឆ្នាំនេះ។ យោងតាមអាជ្ញាធរអ៊ុយក្រែន បានឱ្យដឹងថា កាលពីថ្ងៃពុធ ប្រទេសរុស្ស៊ី បានបាញ់មីស៊ីលចំនួន ៥៦គ្រាប់ និងយន្តហោះដ្រូនចំនួន ២១គ្រឿង ដែលផ្តោតលើការផលិតថាមពល និងកន្លែងបញ្ជូនថាមពលនៅក្នុងតំបន់ចំនួន ៦ របស់អ៊ុយក្រែន។
ក្រុមហ៊ុនវារីអគ្គិសនី Ukrhydroenergo របស់រដ្ឋអ៊ុយក្រែនបានបញ្ជាក់ថា រោងចក្រវារីអគ្គិសនីចំនួនពីរត្រូវបានបញ្ឈប់ប្រតិបត្តិការដោយសារតែការវាយឆ្មក់របស់រុស្ស៊ី៕ ប្រែសម្រួល ឈូក បូរ៉ា
