តូក្យូ៖ ប្រធានាធិបតីអាមេរិកលោក ចូ បៃដិន បានប្រកាសផែនការដាក់ទណ្ឌកម្ម ៤ដងលើរថយន្តអគ្គិសនីរបស់ចិនដល់ ១០០ភាគរយក្នុងឆ្នាំ២០២៤ និងដំឡើងពន្ធយ៉ាងខ្លាំងលើទំនិញរបស់ចិននៅក្នុងវិស័យផ្សេងទៀត ដែលមានសារៈសំខាន់ជាយុទ្ធសាស្ត្រ ដូចជាឧបករណ៍ថាមពលពន្លឺព្រះអាទិត្យ និងឧបករណ៍ពាក់កណ្តាលក្នុងគោលបំណងជួយកម្មករអាមេរិកក្នុងការប្រកួតប្រជែង។
លោក បៃដិន បានឲ្យដឹងនៅក្នុងសុន្ទរកថារបស់លោកនៅឯសេតវិមានថា ការដំឡើងពន្ធដែលនឹងអនុវត្តលើការនាំចូលពីប្រទេសចិនមានតម្លៃប្រហែល ១៨ពាន់លានដុល្លារ គឺសំដៅការពារមហាអំណាចសេដ្ឋកិច្ចអាស៊ីពីការគំរាមកំហែងការងារផលិតកម្មរបស់សហរដ្ឋអាមេរិក និងកាត់បន្ថយឧស្សាហកម្មអាមេរិក។
ជាមួយនឹងការបោះឆ្នោតប្រធានាធិបតីអាមេរិកខិតជិតមកដល់ក្នុងខែវិច្ឆិកា លោក បៃដិន បាននិងកំពុងស្វែងរកការបញ្ចុះបញ្ចូលអ្នកបោះឆ្នោត swing ថាលោកបានដំណើរការជាងអ្នកស្នងតំណែងមុនរបស់លោក គឺលោក ដូណាល់ ត្រាំ លើសេដ្ឋកិច្ច ដោយផ្តល់នូវទីផ្សារការងារប្រសើរជាងមុន និងសន្យាថា នឹងមានការការពារកាន់តែខ្លាំងសម្រាប់កម្មករអាមេរិក ប្រសិនបើពួកគេផ្តល់អាណត្តិទីពីរដល់លោក។
លោក បៃដិន បានលើកឡើងថា “កម្មករអាមេរិកអាចធ្វើការលើសពីការងារ និងប្រកួតប្រជែងអ្នកណាម្នាក់ ដរាបណាការប្រកួតប្រជែងមានភាពយុត្តិធម៌ ប៉ុន្តែអស់រយៈពេលជាយូរមកហើយ វាមិនយុត្តិធម៌នោះទេ។ អស់ជាច្រើនឆ្នាំមកនេះ រដ្ឋាភិបាលចិន បានចំណាយថវិការដ្ឋដល់ក្រុមហ៊ុនចិន នៅទូទាំងឧស្សាហកម្មទាំងមូល”។
លោកបានបន្ដថា ការជន់លិចទីផ្សារពិភពលោករបស់ប្រទេសចិនបង្កើត “តម្លៃទាបអយុត្តិធម៌ ដែលជំរុញឱ្យក្រុមហ៊ុនផលិតផ្សេងទៀតនៅជុំវិញពិភពលោកឈប់រកស៊ី” ដោយលោកបានហៅការអនុវត្តថា “ការបោកប្រាស់” ជាជាងការប្រកួតប្រជែង។
ចិនបានប្រតិកម្មភ្លាមៗចំពោះសកម្មភាពថ្មី ដោយនិយាយថា ពួកគេដើរផ្ទុយនឹងស្មារតីនៃកិច្ចព្រមព្រៀងជាច្រើន ដែលបានសម្រេចរវាងប្រធានាធិបតីចិនលោក ស៊ី ជីនពីង និងលោក បៃដិន៕ ប្រែសម្រួល ឈូក បូរ៉ា
