ប៉េកាំង៖ ប្រទេសទាំងពីរបានឲ្យដឹងថា ប្រធានាធិបតីរុស្ស៊ីលោក វ្ល៉ាឌីមៀ ពូទីន នឹងបំពេញទស្សនកិច្ចផ្លូវរដ្ឋរយៈពេលពីរថ្ងៃនៅប្រទេសចិនចាប់ពីថ្ងៃព្រហស្បតិ៍នេះ តាមការអញ្ជើញរបស់ប្រធានាធិបតីចិនលោក ស៊ី ជីនពីង ។
យោងតាមវិមានក្រឹមឡាំងបានឱ្យដឹងថា លោកពូទីនដែលនឹងធ្វើដំណើរទៅក្រៅប្រទេសជាលើកដំបូងចាប់តាំងពីអាណត្តិទីប្រាំរបស់លោកបានចាប់ផ្តើមកាលពីសប្តាហ៍មុននឹងជួបជាមួយលោក ស៊ី និងនាយករដ្ឋមន្ត្រីចិនលោក លី ឈាំង ហើយថែមទាំងធ្វើទស្សនកិច្ចនៅក្រុងហាប៊ីន ក្នុងខេត្ត Heilongjiang ភាគឦសានប្រទេសចិន ដែលមានព្រំប្រទល់ជាប់នឹងប្រទេសរុស្ស៊ី។
ទីភ្នាក់ងារសារព័ត៌មាន Tass របស់រុស្ស៊ីបានចុះផ្សាយថា មេដឹកនាំទាំងពីរនឹងចូលរួមពិធីរំលឹកខួបលើកទី៧៥ នៃការបង្កើតទំនាក់ទំនងការទូតទ្វេភាគីនៅឆ្នាំនេះ និងចុះហត្ថលេខាលើឯកសារមួយចំនួន។
អ្នកនាំពាក្យក្រសួងការបរទេសចិន លោក Wang Wenbin បានឲ្យដឹងនៅក្នុងសន្និសីទកាសែតនៅទីក្រុងប៉េកាំងថា មេដឹកនាំទាំងពីរនឹងផ្លាស់ប្តូរទស្សនៈស្តីពីទំនាក់ទំនងទ្វេភាគី កិច្ចសហប្រតិបត្តិការលើវិស័យផ្សេងៗ ក៏ដូចជាបញ្ហាអន្តរជាតិ និងតំបន់ដែលមានផលប្រយោជន៍ទៅវិញទៅមក។
លោក ស៊ី និងលោក ពូទីន បានជួបគ្នាដោយផ្ទាល់ពីរដងកាលពីឆ្នាំមុន ដោយប្រទេសរបស់ពួកគេបានពង្រឹងទំនាក់ទំនងក្នុងការផ្លាស់ប្តូរមួយដើម្បីរួមគ្នាប្រឆាំងនឹងសណ្តាប់ធ្នាប់អន្តរជាតិ ដែលដឹកនាំដោយសហរដ្ឋអាមេរិក ហើយចិនប្រឆាំងនឹងទណ្ឌកម្មលោកខាងលិចលើក្រុងម៉ូស្គូ ជុំវិញសង្រ្គាមអ៊ុយក្រែន៕ ប្រែសម្រួល ឈូក បូរ៉ា
