ការ៉ាកាស ៖ អនុប្រធានាធិបតីវ៉េណេស៊ុយអេឡា លោកស្រី Delcy Rodriguez បានថ្កោលទោសទណ្ឌកម្មឯកតោភាគី ដែលដាក់ដោយសហរដ្ឋអាមេរិក និងប្រទេសដទៃទៀតថាជា “យន្តការថ្មី នៃលទ្ធិអាណានិគមនិយម” ។
លោកស្រី Rodriguez បានប្រាប់សិក្ខាសាលាថ្នាក់តំបន់ Caribbean នៃគណៈកម្មាធិការពិសេសអង្គការ សហប្រជាជាតិ ស្តីពីការបំបែកអាណានិគម ដែលបានបើកកាលពីថ្ងៃអង្គារ ក្នុងរដ្ឋធានីការ៉ាកាស របស់ប្រទេសវេណេស៊ុយអេឡាថា “ទណ្ឌកម្ម គឺរួមជាមួយ នឹងសង្រ្គាម ដែលជាអ័ក្សកណ្តាល នៃគោលនយោបាយការបរទេស របស់សហរដ្ឋអាមេរិក”។
លោកស្រីបានលើកឡើងថា គោលនយោបាយនេះបានធ្វើឲ្យប៉ះពាល់ដល់ប្រទេសក្នុងតំបន់ដូចជា គុយបា នីការ៉ាហ្គា និងវេណេស៊ុយអេឡា និងសិទ្ធិសម្រេចដោយខ្លួនឯង។
លោកស្រីបានបន្តថា “វាជារឿងអាម៉ាស់អន្តរជាតិ ដែលក្នុងសតវត្សរ៍ទី ២១ គោលបំណងគឺដើម្បីគ្រប់គ្រងប្រទេសតាមរយៈយន្តការនៃទណ្ឌកម្មសេដ្ឋកិច្ច” នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
អនុប្រធានាធិបតីរូបនេះ បានបន្ដថា ប្រទេសវេណេស៊ុយអេឡា ត្រូវបានទទួលរងនូវវិធានការបង្ខិតបង្ខំឯកតោភាគី ឬទណ្ឌកម្មស្ទើរតែមួយពាន់ ក្នុងគោលបំណងដើម្បី “ផ្លាស់ប្តូរដំណើរនៃឯករាជ្យភាព និងការសម្រេចចិត្តដោយខ្លួនឯង”៕
ប្រែសម្រួល ឈូក បូរ៉ា
